Qarapaıym azamattardyń ulttyq kompanııalardyń aktsııalaryn ıelený múmkindigi bolýǵa tıis  - Prezıdent
2022 jylǵy 27 maýsym 14:43

Qarapaıym azamattardyń ulttyq kompanııalardyń aktsııalaryn ıelený múmkindigi bolýǵa tıis - Prezıdent

NUR-SULTAN. QazAqparat - Memleket basshysy «Astana» halyqaralyq qarjy ortalyǵyn basqarý jónindegi keńestiń otyrysyn ótkizdi, dep habarlaıdy Aqordanyń baspasóz qyzmeti.

Jıyn barysynda «Astana» halyqaralyq qarjy ortalyǵynyń (AHQO) 2021 jyly atqarǵan jumystary qorytyndylandy jáne ony ári qaraı damytý jónindegi usynystar qarastyryldy.

Qasym-Jomart Toqaev halyqaralyq jaǵdaı qubylyp turǵan kezde ınvestıtsııalyq turaqtylyq pen boljamdylyqty qamtamasyz etýge qabiletti senimdi qarjy kózderin izdeý ózekti bolatynyn aıtty. «Astana» halyqaralyq qarjy ortalyǵy Qazaqstan men búkil Ortalyq Azııa aımaǵy úshin osyndaı mindetti atqaratyn mekemelerdiń biri sanalady.

– Qazaqstan naryqtyq, erkin ári básekeli ekonomıkany qarqyndy ilgeriletýge baǵyttalǵan damýdyń jańa kezeńine qadam basyp otyr. Mundaı jaǵdaıda sheteldik ınvestorlar men saýda seriktesteriniń senimin saqtap qalý jáne nyǵaıtý bizdiń basty basymdyǵymyz bolyp qala beredi. Osyǵan baılanysty AHQO-nyń áleýeti ınvestıtsııalardyń senimdiligi men qaýipsizdiginiń kepili retinde barynsha paıdalanylýǵa tıis, – dedi Prezıdent.

Memleket basshysy AHQO-nyń aldynda jetekshi qarjy ortalyǵy retinde óz mártebesin ınstıtýtsıonaldy turǵydan nyǵaıtý mindeti turǵanyn atap ótti. Osyǵan oraı Memleket basshysy birqatar ózekti máselege nazar aýdardy.

Atap aıtqanda, Qasym-Jomart Toqaev sanktsııalyq máselege mán bere otyryp, sheteldik kompanııalardyń AHQO-ǵa tirkelý talaby barynsha ońaı ári lıberaldy bolýǵa tıis ekenine toqtaldy. Prezıdent AHQO-nyń sheteldik seriktestermen dıalog júrgizýi qajet ekenin atap ótti jáne qarjy retteýshilerimen tyǵyz yqpaldastyq ornatýdyń mańyzdylyǵyn jetkizdi. Osy rette jalpy úılestirý jumystary Úkimetke júkteldi. Sondaı-aq Prezıdent Ortalyqtyń retteýshilik qyzmeti men normatıvtik-quqyqtyq bazasy derbestigi men táýelsizdigin saqtap qalýy kerek ekenin aıtty.

Memleket basshysy ulttyq kompanııalardy IPO-ǵa shyǵarý jumystaryn kelesi mańyzdy mindet retinde atady. «Samuryq-Qazyna» aktsıonerlik qoǵamy men onyń ulttyq kompanııalarynyń rólin mysalǵa keltirdi.

– Elimizdiń qarapaıym azamattary Ulttyq kompanııalardyń aktsııalaryn ıelenýge jáne salymdarynan óz dıvıdentterin alýǵa múmkindigi bolýǵa tıis. Dál osyndaı jolmen halyqtyń ınvestıtsııalyq mádenıeti qalyptasady. IPO-ǵa qatysý Qazaqstannyń barlyq turǵyny úshin qoljetimdi bolýy qajet. Ol úshin qaǵazbastylyq pen bıýrokratııany boldyrmaıtyn jańa tsıfrlyq sheshimder kerek, – dedi Memleket basshysy.

Sonymen qatar Qasym-Jomart Toqaev uzaq merzimdi sheteldik ınvestorlardy teńge túrindegi táýelsiz oblıgatsııalarǵa tartýdyń ózektiligin atap ótti. Prezıdent qazirgi qubylmaly jaǵdaıda ınvestıtsııalar men resýrstar úshin básekelestik kúsheıedi degen pikir bildirdi. Investorlar korporatıvtik basqarý qaǵıdattary joǵary deńgeıde saqtalatyn, zań ústemdik etetin jáne halyqaralyq ıýrısdıktsııasy bar alańdardy izdeıdi.

– Elimizge jańa ári senimdi ınvestıtsııa kózderi qajet. Ol úshin halyqaralyq depozıtarıılermen ózara tyǵyz yqpaldastyq ornatý kerek. Mundaı jaǵdaıda retteýshilik rejım men halyqaralyq quqyqqa negizdelgen AHQO alańy tartymdy bolady. Úkimetke Ulttyq bankpen jáne AHQO-men birlese otyryp, uzaq merzimdi ınstıtýtsıonaldyq ınvestorlary bar álemdik ınfraqurylymǵa qosylý máselesin pysyqtaýdy tapsyramyn. Bul ekonomıkamyzdyń ornyqty ósimi úshin mańyzdy qadam bolmaq, – dedi Prezıdent.

Budan bólek Memleket basshysy ornyqty damý maqsattaryna qol jetkizý jáne «jasyl» jobalardy júzege asyrý máselesine toqtaldy. Onyń aıtýynsha, byltyr ornyqty qarjylandyrý naryǵynyń kólemi 500 ese ulǵaıyp, 250 mıllıon dollardan asty. Onyń ishinde jasyl oblıgatsııalar men nesıelerdiń 58 paıyzyn AHQO Jasyl qarjy ortalyǵy naqtylady.

– Bul ekonomıkany kómirteginen aryltý jáne kómirtegin az paıdalaný tehnologııalaryn damytý jónindegi jahandyq mindetterdi elimizdiń sátti sheshýge qabiletti ekenin dáleldeýine yqpal etedi. Úkimetti, «Astana» halyqaralyq qarjy ortalyǵyn jáne Keńes múshelerin osy baǵyttaǵy jumystyń qarqynyn báseńdetpeı, jalǵastyra berýge shaqyramyn, – dedi Prezıdent.

Qasym-Jomart Toqaev energııa tasymaldaýshy jahandyq naryqtardyń jáne álemdik azyq-túlik ortalyqtarynyń transformatsııalanýy kezinde Qazaqstannyń rólin kúsheıtý mańyzdy ekenine nazar aýdardy. Atap aıtqanda, Memleket basshysy úzdik halyqaralyq standarttarǵa sáıkes keletin jáne kez kelgen táýekel-qaterlerden alshaq turatyn basty taýar bırjasyn ornalastyrý máselesin sheshýdiń ózektiligin atap ótti.

– Qazaqstan úshin senimdi ári básekege qabiletti ınfraqurylymy bar bırja naryǵy jóninde málimdeý óte mańyzdy. Bul aımaqtyq jáne jahandyq saýdada kóshbasshylyqqa ıe bolý úshin jańa múmkindikterge jol ashady. Úkimet osy máseleni jan-jaqty pysyqtaýy kerek, – dedi Prezıdent.

Memleket basshysy krıptoındýstrııa jáne tsıfrlyq aktıvterdi damytý máselelerine de toqtaldy.

– Biz áleýetimizdi barynsha tıimdi paıdalanýymyz kerek. Elimiz krıptoaktıvterdi shyǵarý boıynsha ekinshi orynda tur. Alaıda biz tek qana shıkizat mártebesin ustanyp qalmaýymyz kerek. Osy oraıda, Úkimet qarjy retteýshilerimen jáne «Astana» halyqaralyq qarjy ortalyǵymen birlese otyryp, keshendi tsıfrlyq ekojúıeni damytý úshin qolaıly jaǵdaı jasaýy qajet, – dedi Qasym-Jomart Toqaev.

Memleket basshysy jıyndy qorytyndylaı kele, AHQO-nyń 2021 jyly atqarǵan jumysynyń jyldyq esebin bekitti.

Іs-shara barysynda Premer-mınıstr Álıhan Smaıylov, AHQO basqarýshysy Qaırat Kelimbetov, Memleket basshysynyń ekonomıkalyq damý jónindegi shtattan tys keńesshisi Ser Sýma Chakrabartı, Qarjy naryǵyn retteý jáne damytý agenttiginiń tóraǵasy Mádına Ábilqasymova, AHQO-nyń táýelsiz qarjy baqylaýshysy Mark Smıt, Jahandyq damý ortalyǵynyń prezıdenti Ahmed Masýd, G30 tobynyń qamqorshylyq keńesiniń tóraǵasy Djeıkob Frenkel, Citigroup úkimetter men memlekettik sektordyń jahandyq blogynyń basshysy Djýlı Monako baıandama jasady.


Uqsas jańalyqtar

Jańalyqtar

Úrdis

MURAǴAT