Jańalyqtar  >

Karantınde múgedektigi bar qazaqstandyqtar aqparattyq vakýýmda qaldy - depýtat

2022 jylǵy 29 qyrkúıek, 14:30
Karantınde múgedektigi bar qazaqstandyqtar aqparattyq vakýýmda qaldy - depýtat

ASTANA. QazAqparat – Pandemııa karantıni kezinde múgedektigi bar qazaqstandyqtar aqparattyq vakýýmda qaldy. Oǵan sandyq tehnologııa múmkindikterin emin-erkin paıdalana almaýy sebep boldy. Senator Lázzat Qaltaeva óziniń depýtattyq saýalynda múgedektigi bar adamdar tap bolyp júrgen qıyndyqtar týraly másele kóterdi, dep habarlaıdy QazAqparat tilshisi.

Onyń aıtýynsha, tótenshe jaǵdaı kezinde qazaqstandyqtardyń bul toby aqparatty tıisti deńgeıde ala almaýymen qosa, áleýmettik kómek pen qyzmetterdi, onyń ishinde ónimder men dári-dármekterdi jetkizýge onlaın tapsyrys bere almady.

«Múgedek adamdardy aqparatpen, tsıfrlyq resýrstarmen jáne servıstermen qamtamasyz etý jónindegi qoldanystaǵy standarttardy qaıta qaraý qajettigi bar. Kún tártibinde turǵanyna kóp ýaqyt bolsa da, «Baspa aqparatynda jarııalanǵan shyǵarmalardy kórý qabileti buzylǵan nemese basqa da múmkindikteri shekteýli adamdarǵa qabyldaýdy jeńildetý týraly» Marrakesh kelisimine qol qoıylǵan joq. Mádenı, bilim berý jáne ǵylymı resýrstardan málimet alýǵa múmkindik beretin osy shartqa qol qoıý, sondaı-aq aýdıodeskrıptsııany engizý – kórý qabileti buzylǵan qazaqstandyqtardyń kópten bergi suranysy bolyp otyr», - dedi senator Úkimet basshysy Álıhan Smaıylovtyń atyna joldaǵan saýalynda.

Osy oraıda, Lázzat Qaltaeva múgedektigi bar adamdarǵa arnalǵan tsıfrlyq resýrstar men servısterdi qamtamasyz etý standarttaryn qaıta qaraý, tótenshe jaǵdaı kezinde halyqty habardar etý arnalarymen qamtamasyz etýge qatysty múgedek adamdarǵa yńǵaıly aqparat taratý túrlerin eskere otyryp sharalar qabyldaý qajettigin jetkizdi.

«Qazirgi ýaqytta Úkimet Áleýmettik kodeksti ázirlep jatyr. Bul múgedektigi bar qazaqstandyqtardyń aqparat alý quqyǵyna qatysty asa mańyzdy jáne kópten kútken ózgeristerdi engizýdiń eń qolaıly ýaqyty dep esepteımiz», - dedi depýtat L. Qaltaeva.


Uqsas jańalyqtar
Seriktester jańalyqtary

Jańalyqtar