Jańalyqtar  >
Qaraǵandylyq hırýrgter qolqa tamyry úzilgen naýqastyń ómirin saqtap qaldy
2022 jylǵy 11 tamyz 05:26

Qaraǵandylyq hırýrgter qolqa tamyry úzilgen naýqastyń ómirin saqtap qaldy

QARAǴANDY. QazAqparat – Qaraǵandy qalasyndaǵy kardıohırýrgııa ortalyǵynda kúrdeli ota jasaldy. Mamandar qolqa tamyry úzilgen naýqastyń ómirin saqtap qaldy, dep habarlaıdy QazAqparat tilshisi.

Qaraǵandylyq kardıohırýrg dárigerler qolqa tamyry úzilgen 58 jastaǵy naýqastyń ómirin saqtap qaldy.

Qaraǵandylyq Vıktor Bojenkoǵa aortanyń jarylýy dıagnozy qoıyldy.

«Tamyrdyń jarylýy eki kezeńnen turady. Keıde aorta úzilip ketedi de, adam kóz jumady. Al keıde ishki bólik jarylyp, tamyr syrtqy qabatynda ustalyp turady. Bul aman qalýǵa múmkindigi bar patsıentter, biz jyrtylǵan jerdi protezdeý jumystaryn júrgizemiz. Bul naýqasta aortanyń kóterilip kele jatqan bóligi ǵana zaqymdalmaı, tamyrdyń úzilýi joǵaryǵa shyǵyp ketken. Bul aýmaqty protezdeý qıyn, munda tamyrlar kóp», – deıdi joǵary sanatty kardıohırýrg, kardıoortalyqtyń dırektory Arystan Maǵzumov.

Joǵarǵy bólim men aorta doǵasyn protezdeý operatsııasy shamamen bes saǵatqa sozyldy. Naýqas jasandy qanaınalym apparatyna qosyldy, júrek biraz ýaqytqa toqtap, deneni 18 gradýsqa deıin salqyndatty. Vıktor eki aptaǵa jýyq jan saqtaý bóliminde boldy. Sodan keıin ońaltý kýrsynan ótti.

«Qazir qalpyma kelip jatyrmyn. Meniń oıymsha, bul jaǵdaıda maǵan taǵdyr eki ret syılyq jasady. Jedel járdem feldsheri óte tájirıbeli bolyp shyqty jáne birden kardıologııalyq ortalyqqa jiberýge sheshim qabyldady. Ekinshi ret baǵymnyń ashylǵany osyndaı hırýrgtarǵa túskenim», – deıdi Vıktor.

Jyl basynan beri oblystyq kardıohırýrgııa ortalyǵynda aortasy úzilgen bes naýqasqa ota jasaldy. Dárigerler bul patologııanyń qaýipti tobyna emdeýden ótpeıtin joǵary qan qysymy bar jáne aterosklerozy bar adamdar jatqyzylatynyn aıtady. Aıta ketý kerek, aortanyń jyrtylý jaǵdaılarynyń 80%-y ólimmen aıaqtalady, óıtkeni bul eń úlken tamyr jáne onyń qabyǵy tolyq jyrtylsa, adam kóp qan joǵaltady.

«Bul patologııanyń kúrdeliligi men qaýiptiligi – oǵan tán kelmeıtin belgiler. Arnaıy ádistersiz – kompıýterlik tomografııa, kardıoskopııa, klınıkalyq dıagnoz qoıý óte qıyn. Dıagnozdan keıin bir ǵana sheshim bar – adam múmkindiginshe tezirek operatsııaǵa barýy kerek», – deıdi kardıohırýrgııa bóliminiń meńgerýshisi Sergeı Tsoı.


Uqsas jańalyqtar
Seriktester jańalyqtary

Jańalyqtar

Úrdis

MURAǴAT