Qaraǵandyda vaktsınadan bas tartýdyń kesirinen balalar arasynda týberkýlez órship tur
2022 jylǵy 27 maýsym 22:52

Qaraǵandyda vaktsınadan bas tartýdyń kesirinen balalar arasynda týberkýlez órship tur

QARAǴANDY. QazAqparat – Qaraǵandy dárigerleri balalar men jasóspirimder arasynda týberkýlezben syrqattaný kórsetkishi artqanyn aıtady. Mamandardyń pikirinshe, bul derttiń órshýine ata-analardyń BTsJ vaktsınasynan bas tartýy sebep bolyp otyr, dep habarlaıdy QazAqparat tilshisi.

Qaraǵandy oblysynda osy jyldyń 5 aıynda balalar arasynda týberkýlezben syrqattaný 28,6%, jasóspirimder arasynda 37,5% óskeni baıqalady

100 myń bala sanyna shaqqanda kórsetkish 2,1-di qurady, al jasóspirimder arasynda 8 jaǵdaı tirkelgen, syrqattaný kórsetkishi - 14,6.

«Ókinishke qaraı, sońǵy ýaqytta balalar densaýlyǵyna jaýap beretin ata-analardyń BTsJ vaktsınatsııasy men revaktsınatsııasynan bas tartýy jıilep ketti. Týǵan balalardyń ishinen 656 náreste ekpe almaǵan, perzenthanada vaktsınatsııamen qamtylmaǵandar úlesi 8,6% qurady, onyń ishinde ýaqytsha medıtsınalyq shettetý sebepteri boıynsha – 4,5% (346 jaǵdaı), vaktsınadan bas tartý sebepteri boıynsha – 4 % (302 jaǵdaı), basqa sebepter boıynsha -0,6% (8 jaǵdaı)», - dep málimdedi Qaraǵandy oblysynyń sanıtarlyq epıdemıologııalyq baqylaý departamenti.

DDU usynymyna sáıkes týberkýlezdiń aýyrtpalyǵy joǵary elderde búkil emshektegi balalar BTsJ vaktsınasynyń 1 dozasyn týǵannan keıin múmkindiginshe erterek alýy tıis.

Sońǵy bes aıda Qaraǵandy oblysynda 7 624 sábı dúnıege kelgen. Perzenthanalar men bólimshelerde 6 968 bala týberkýlezge qarsy egildi (91,4%) – bul tsıfr DDU usynǵan 95%-dan kem emes jáne respýblıkalyq kórsetkishten (93,2%) tómen bolyp otyr.

«Balalar arasyndaǵy týberkýlezdiń aldyn alýdyń negizgi sharasy – sábı ómiriniń alǵashqy 1-4 kúninde qarsy kórsetilim bolmaǵan jaǵdaıda perzenthanada salynatyn BTsJ vaktsınasy. BTsJ vaktsınatsııasy balalarda osy aýrýdyń aldyn alý úshin qajet jáne óte mańyzdy. Ol týberkýlez qozdyrǵyshyn juqtyrýdan qorǵamaıdy, biraq jasyryn ınfektsııanyń aıqyn aýrýǵa ótýine jáne týberkýlezdiń jedel jáne jalpy túrleriniń damýyna jol bermeıdi», - dep túsindirdi departament mamandary.

Týberkýlez álemdegi eń kóp taraǵan ınfektsııalardyń biri bolyp qala beredi: álemde ony árbir úshinshi adam juqtyrǵan.

Halyq arasynda týberkýlezben syrqattanýdyń órshýi balalar arasynda juqtyrý deńgeıiniń ósýine yqpal etip otyr.

Olar eresekterge qaraǵanda bul aýrýǵa kóbirek beıim keledi.


Seriktester jańalyqtary

Jańalyqtar

Úrdis

MURAǴAT