Qaraǵandyda eki jasar qyz balaǵa álemdegi eń qymbat ınektsııa jasaldy
2022 jylǵy 13 sáýir 14:15

Qaraǵandyda eki jasar qyz balaǵa álemdegi eń qymbat ınektsııa jasaldy

QARAǴANDY. QazAqparat – Qaraǵandy oblysy Shet aýdanynyń Aqsý-Aıýly aýylynda turatyn eki jasar Aısezim Jańbyrbaı Zolgensma gendik terapııa preparatymen ınektsııa alǵan Qazaqstandaǵy tórtinshi bala boldy. Búgingi tańda ol - álemdegi eń qymbat dári jáne mıllıard teńgege satylady. Qyz bala julyn bulshyqetiniń atrofııasynan zardap shegedi, dep habarlaıdy QazAqparat tilshisi.

Aısezim - otbasyndaǵy úshinshi bala. Ótken jyldyń qyrkúıeginde balaǵa aýyr dıagnoz qoıyldy.

Biraq ata-anasy Aısezim týǵannan birneshe aı ótken soń dabyl qaǵa bastaǵanyn aıtady.

«Aısezim 2020 jyldyń maýsym aıynda dúnıege kelgen. Júktilik kezinde búkil skrınıngten óttim. Bári qalypty boldy. Bosaný ýaqytynda asqyný bolmady. Birneshe aıdan keıin qyzymyzdyń basyn ustamaıtynyn baıqadyq. Sodan beri ony dárigerlerge aparyp, tekserte bastadyq. Dıagnoz týraly bilgen bette birden qarajat jınaý týraly úndeý tastadyq. «Ómirge sen» qoryna júgindik, olar bizge «Qazaqstan halqyna» qoryna ótinim berýge kómektesti», – deıdi sábıdiń anasy Janna Aldabergenova.

«Qazaqstan halqyna» qory ótinimdi maquldap, shveıtsarııalyq Novartis kompanııasyna zolgensma satyp alýǵa mıllıard teńge bóldi.

Aısezimge 7 sáýirde kópten kútken ınektsııa jasaldy. Preparat bir ret engiziledi.

Ol aýrýdyń ári qaraı taralýyna jol bermeıdi. Nátıjesinde julyn neırondarynyń ólimi toqtaıdy.

«Bul preparat bizge úmit berdi. Biraq ázirge aldyn ala eskertilgen janama áserler shyǵyp jatyr. Bul - qusý, temperatýra. Bolashaqta Aısezimniń densaýlyǵy jaqsarady degen úmittemiz. Bir ǵana dári, árıne, ǵajaıyppen tolyqtaı emdelip ketýge kómektespeıdi. Ári qaraı bári bizge baılanysty. Qyzyma muqııat kútim, qamqorlyq, uzaq ońaltý qajet. Biz alty aı boıy baqylaýda bolamyz. Ári qaraı kóre jatarmyz. Men aýyryp jatqan búkil balalardyń ata-anasyna shydam pen kúsh tileımin», - deıdi Janna.

Aısezim Jańbyrbaıdyń týystary «Qazaqstan halqyna» qoryna kórsetken kómegi úshin alǵys aıtty.


Uqsas jańalyqtar
Seriktester jańalyqtary

Jańalyqtar

Úrdis

MURAǴAT