Jańalyqtar  >

Qaraǵandy turǵyny áıgili ánshi Rıannanyń beınerolıkterine montaj jasap berdi

2022 jylǵy 29 qarasha, 01:05
Qaraǵandy turǵyny áıgili ánshi Rıannanyń beınerolıkterine montaj jasap berdi

QARAǴANDY. QazAqparat – Qaraǵandylyq saýnd-dızaıner Ádilhan Dúısembaev R&B jáne pop-mýzyka oryndaýshysy Rıannanyń promorolıkterimen jumys istedi. Onyń jumys nátıjesi tapsyrys berýshi BRTHR stýdııasyna ǵana emes, ánshiniń ózine de unaǵan, dep habarlaıdy QazAqparat tilshisi.

Ádilhan Dúısembaev bul salaǵa jańa kelgen maman emes. Ol 10 jyldan beri foto jáne vıdeo túsirýmen, sondaı-aq montajdaýmen aınalysady. Snipes jáne Levi's sııaqty tanymal brendtermen jumys istegen. Bıyl qazaqstandyq breıkdanser Nıkolaı Chernıkov týraly derekti fılm túsirdi.

Rıannaǵa arnalǵan vıdeolardy montajdaý tapsyrysy Ádilhanǵa shoý-bıznes juldyzdarymen burynnan jumys istep kele jatqan BRTHR stýdııasynan keldi.

«Men Savage x Fenty Show úshin promorolıktermen jumys istedim – bul Rıanna brendiniń jyl saıynǵy sán kórsetilimi týraly arnaıy amerıkalyq televızııalyq shyǵarylym. BRTHR stýdııasynyń rejısserinen tapsyrma aldym jáne olar barlyq áreketime tolyq erkindik berdi. Jumysty ýaqytynda aıaqtaý úshin tańerteńnen keshke deıin eki apta boıy, úıden shyqpaı eńbek ettim. Bul Rıannaǵa arnalǵan ekinshi beınerolık. Sondaı-aq men osy jobaǵa arnalǵan jarnama rolıginiń montajyn jasadym. Onyń qalaı shyqqanyn @urbanfocus93 Instagram-paraqshamnan kórýge bolady», - deıdi Ádilhan.


Jas jigittiń bul salada arnaıy bilimi joq. Ádilhannyń aıtýynsha, ol aldymen fotoǵa, sodan keıin vıdeo túsirýge qyzyǵýshylyq tanytqan. Basqalardyń ne istep jatqanyn kóp baqylap, osy saladaǵy áýesqoılarmen jáne mamandarmen aralasa bastaǵan. Amerıkalyq reper ScHoolboy Q-diń Máskeýdegi kontsertiniń túsirilimi onyń kásibıligine serpilis ákelgen.

«Bul eki jyl buryn bolǵan oqıǵa. ScHoolboy Q – kýmırim. Men onyń kontsertine bılet satyp aldym jáne akkredıttelmegen bolsam da, túsirýge bel býdym. Uıymdastyrýshylardyń biri qaraǵandylyq bolatyn, ol meni ScHoolboy Q-men tanystyrdy. Mýzykant muny kórgende meni óziniń storızine shyǵardy. Sol kezde bizdi onyń 5 mıllıonǵa jýyq jankúıeri kórdi. Sodan keıin kontsertte túsirgen beınerolıgimdi Instagram-da jarııaladym. Ol 15 myńǵa jýyq qaralym jınady. Meniń oıymsha, olar meni sol kezde baıqady. Qazir ınternettiń kómegimen búkil álemge tanymal bolýǵa múmkindik bar. Tek óz isińe senip, ony súıý kerek», - dep esepteıdi Ádilhan.

Rıannanyń rolıkterimen jumys istegennen keıin qaraǵandylyqqa kóptegen jańa usynystar kelip túsken. Ol jaıly Ádilhan ázirge bóliskisi kelmeıtinin aıtady.


Uqsas jańalyqtar
Tegı:
Seriktester jańalyqtary

Jańalyqtar