Qaraǵandy polıtseıleri 9-qabattan sekirmek bolǵan kelinshekti qutqardy

QARAǴANDY. QazAqparat - Patrýl polıtsııasy polkiniń qyzmetkerleri ózine qol jumsamaq bolǵan qaraǵandylyq azamatshany qutqardy, dep habarlaıdy QazAqparat tilshisi.

8 qarasha kúni 102 telefonyna qala turǵyny habarlasyp, Satybaldın kóshesi, 18-úıdiń 9-qabatynan belgisiz azamatshanyń sekirmek bolǵanyn aıtqan.

«Oqıǵa orynyna birden patrýl polıtsııasy polkiniń ınspektory, polıtsııa leıtenanty Erasyl Murat pen polıtsııa serjanty Bekzat Omashev mingen 0913 ekıpajy jiberildi. ​Olar 9 qabatty úıdiń shatyrynan túsip, balkon ústinde otyrǵan áıeldi baıqaǵan», - dep málimdedi PD baspasóz qyzmetinde.

Qaıǵyly oqıǵanyń aldyn alý maqsatynda leıtenant Erasyl Murat ýaqytty únemdi paıdalanyp, azamatshanyń nazaryn aýdarý maqsatynda áńgimege tartqan. Bul kezde polıtsııa kishi serjanty Bekzat Omashev óz ómirin qaterge baılap, úıdiń ústinen balkonǵa túsip, áıeldiń sýıtsıd jasaýyna múmkindik bermedi. Polıtsııa qyzmetkerleriniń áıeldi qutqarý oqıǵasyn bastan-aıaq kórshi úıdiń turǵyny Natalıa Aınabekova baqylap, vıdeoǵa túsirip turǵan jáne polıtsııa qyzmetkerlerine habarlasqan da osy kisi eken.

«Men alǵashynda úıdiń tóbesinde júrgen bıiktikti unatatyn ekstremal dep oıladym. Keıin beınejazbany jaqyndatyp kórgenimde áıeldi baıqadym. Birden oıyma 102 telefonyna qońyraý shalý tústi. Polıtsııa qyzmetkerlerine óte rızamyn. Olar óte jyldam ári saýatty is-áreket jasap, adam ómirin saqtap qaldy. Batyrlar aramyzda júr eken», - deıdi oqıǵa kýágeri.

Polıtseılerdiń aıtýynsha, 24 jastaǵy kelinshektiń bul áreketke barýyna otbasyndaǵy janjal sebep bolǵan. Qazirgi ýaqytta kelinshekpen psıhologtar jumys isteýde.