Qaraǵandy oblysynyń úzdik ustazdaryna 1 mln teńgeden berildi

2022 jylǵy 2 qazan, 00:27
Qaraǵandy oblysynyń úzdik ustazdaryna 1 mln teńgeden berildi

QARAǴANDY. QazAqparat – Kásibı mereke qarsańynda Qaraǵandy qalasynyń Kenshiler mádenıet saraıynda óńirdiń pedagogtaryna qurmet kórsetildi, dep habarlaıdy QazAqparat tilshisi.

Óńir basshysy Jeńis Qasymbek ustazdardy quttyqtap, bilim berýdi damytýǵa qosqan úlesteri úshin tósbelgiler men qurmet gramotalaryn tabys etti.

«Óz ómirin muǵalim mamandyǵyna arnaǵan adamdardyń erekshe bedelge ıe bolýy kezdeısoq emes. Óıtkeni, adam ómirde qandaı jetistikke jetse de, onyń tulǵa retinde qalyptasýynda onyń muǵalimderi mańyzdy ról atqarady. Jas muǵalimderge úlgi bola otyryp, óz kásibine degen adaldyqtyń úlgisi boǵan, eńbegin jalǵastyryp kele jatqan bizdiń bilim berý ardagerlerine erekshe alǵys. Sizderdiń baǵa jetpes eńbekterińiz ben tańdalǵan iske adaldyǵyńyz úshin rahmet! Memleket tarapynan pedagogıkalyq kásiptiń bedelin kóterý úshin kóp nárse jasalýda. Sońǵy úsh jylda muǵalimderdiń jalaqysy 75%-ǵa ósti, muǵalimderdiń shamamen 60% - y sanat úshin 50%-ǵa deıin qosymsha aqy alady», – dedi Jeńis Qasymbek.

Oblysta aýyldyq jerlerde bilim berýdi damytýǵa erekshe kóńil bólinedi. Sońǵy eki jylda 126 jas maman turǵyn úımen qamtamasyz etildi. Sondaı-aq, jumysqa ornalasý kezinde olar 100 aılyq eseptik kórsetkish mólsherinde kóterme qarajat alady.

Jeńis Qasymbek pedagogıkalyq saladaǵy jetistikteri úshin bilim berý qyzmetkerlerine «Qaraǵandy oblysynyń bilim berý salasynyń qurmetti pedagogy» tósbelgilerin tabys etti. Oblystyq erekshelik belgisi birneshe jyl buryn muǵalimder eńbeginiń bedelin arttyrý úshin qurylǵan. Oǵan mıllıon teńgeden astam aqshalaı syıaqy qosa beriledi.

Bıyl «Qaraǵandy oblysynyń bilim berý salasynyń qurmetti pedagogy» tósbelgilerine bes ustaz ıe boldy:

1. Serikbol Shatınov, Qaraǵandy mashına jasaý kolledjiniń dırektory, jalpypánder boıynsha oqytýshy.

2. Dıdar Tórekeldına, Qaraǵandy qalassynyń № 61JBM qazaq tili jáne ádebıeti pániniń muǵalimi.

3. Sergeı Zýbrın, Osakarovka aýdanynyń № 9 gınazııasynyń bazasyndaǵy tirek mektebiniń ınformatıka pániniń muǵalimi.

4. Janat Bazarbaeva, Temirtaý qalasynyń qyzdar gımnazııasynyń tarıh pániniń muǵalimi.

5. Ararat Esmaganbetov, Shahtınsk qalasynyń A.Bókeıhan atyndaǵy mektep-lıtseıiniń dırektory, matematıka pániniń muǵalimi.

Marapattalǵan ustazdardyń árqaısysynyń kóp jyldyq jumys tájirıbesi jáne ózindik erekshe eńbegi bar. Olardyń árbireýi jas urpaqty tárbıeleýge jan saldy.

Qaraǵandy qalasynyń № 61 jalpy bilim beretin mektebiniń qazaq tili men ádebıeti pániniń muǵalimi Dıdar Tórekeldınanyń ustazdyq eńbek ótili - 27 jyl. Eńbek jolyn 18 jasynda Qarqaraly aýdanynyń shaǵyn jınaqty mektebinde bastaǵan.

«Mektepten keıin men ýnıversıtettiń fılologııa fakýltetiniń syrttaı bólimine tústim. Sol jyldary muǵalimderdiń tapshylyǵy boldy, meni ýnıversıtette oqý týraly anyqtama boıynsha jumysqa aldy. Sodan beri meniń ómirim balalarmen tyǵyz baılanysty. Men mamandyǵymdy súıemin, onymen ómir súremin. Osy jyldarda 20-dan astam oqýshym júldeli oryndarǵa ıe bolyp, túrli respýblıkalyq baıqaýlarda jeńiske jetti. Men búgingi syılyqty olarǵa arnaımyn. Bul bizdiń ortaq jeńisimiz, óıtkeni ustazdyń eńbegi oqýshylardyń jetistikteri boıynsha baǵalanady», – deıdi Dıdar Tórekeldına.

Shahtınsk qalasynyń A. Bókeıhan atyndaǵy mektep-lıtseıiniń dırektory Ararat Besmaǵanbetov – Nura aýdanynyń týmasy. 26 jyl bilim berý salasynda jumys istedi. Ol bolashaq mamandyǵyn mektepte tańdaǵan.

«Men 21 jasymnan bastap ustazdyq jolynda júrmin. Óz jumysymdy jaqsy kóremin, bul meniń sanaly tańdaýym boldy. Muǵalimniń jumysy ońaı emes, biraq men bul joldy tańdaǵanyma qýanyshtymyn. Bizdiń lıtseıdiń oqýshylary jaqsy nátıje kórsetip, túrli baıqaýlar men olımpıadalarda júldeli oryndarǵa ıe bolýda. Bul marapat búginde meniń búkil ujymymnyń eńbeginiń nátıjesi. Barlyq muǵalimderdi merekemen quttyqtaımyn!» – dedi Ararat Besmaǵanbetov.

Sonymen qatar aımaqtyń 10 muǵalimi ustazdyq jolyndaǵy joǵary kórsetkishteri úshin oblys ákiminiń Qurmet gramotalarymen marapattaldy. Alty ustaz «Ybyraı Altynsarın», bes muǵalim «Eńbek ardageri» jáne tórt pedagog – «Bilim berý isiniń Qurmetti qyzmetkeri» tósbelgilerine ıe boldy.


Tegı:
Seriktester jańalyqtary

Jańalyqtar