Qaraǵandy oblysynyń ákimdigi aýyl turǵyndaryna bıznesti damytýǵa kómektesedi
QARAǴANDY. QazAqparat - Qaraǵandy oblysynda aýyl turǵyndaryna óz isin ashýǵa jáne damytýǵa kómek kórsetiledi. Ol úshin tıimdi mıkrokredıtter beriletin bolady. Óńirde aýyl turǵyndarynyń tabysyn arttyrý jobasy keńeıtilýde, dep habarlaıdy QazAqparat.
Qaraǵandy oblysy Aýyl sharýashylyǵy basqarmasynyń basshysy Asqar Sanaýbarov nesıeleý sharttary qandaı jáne aýyl turǵyndarynyń tabysyn arttyrý jobasyna kim qatysa alatyny týraly aıtyp berdi.
- Búgingi tańda barlyq aýdandarda jumys toptary quryldy. Nesıeleý boıynsha negizgi talaptar men erejelerdi túsindirý boıynsha turǵyndardyń jıyndary ótkiziledi. Aýyldyń áleýmettik-ekonomıkalyq ahýalyn anyqtaý úshin oblystyń barlyq aýyldyq okrýgterine skrınıng júrgizildi. Sondaı-aq aýdandarda aýyl sharýashylyǵy kooperatıvterine berý úshin jer ýchaskelerin rezervteý jumystaryn júrgizip jatyrmyz. Boljamdy kepilderdi, áleýetti qaryz alýshylardy taldaý boıynsha jumys júrgizilýde.
– Qaraǵandy oblysyna qansha qarajat pen qaryz bólindi?
– 2023 jyldan 2025 jylǵa deıin 4,6 mlrd teńge bólý josparlanýda. Bıyl 2,4 mlrd teńge qarastyrylǵan. 500-ge jýyq shaǵyn qaryz berý josparda bar. Bul rette startaptardyń úlesi barlyq berilgen nesıelerdiń keminde 30 % quraýy tıis.
– Mıkronesıeni kim ala alady jáne sharttary qandaı?
– Shaǵyn nesıeler aýyl turǵyndaryna mal sharýashylyǵy, ósimdik sharýashylyǵy jáne aýyl sharýashylyǵy ónimderin qaıta óńdeý jobalaryn iske asyrý úshin beriletin bolady. Ózge de baǵyttar jeke qarastyrylady. Pılottyq jobaǵa qatysatyn aýyldyq okrýgterdi biz áli anyqtap jatyrmyz.
Shaǵyn nesıe alýdyń mindetti sharty salyq organdarynda tirkeý jáne kepilmen qamtamasyz etý bolady.
Mal sharýashylyǵy salasynda mıkrokredıt berý merzimi – 7 jyl, qalǵan salalar boıynsha – 5 jyl. Nomınaldy syıaqy mólsherlemesi – 2,5 %. Negizgi borysh pen syıaqyny óteý boıynsha jeńildik kezeńi kózdeletin bolady, ol mıkrokredıtteý merzimi uzaqtyǵynyń 1/3 (úshten birinen) aspaıtyn bolady.
– Maksımaldy soma qansha?
– Zákirli aýyl sharýashylyǵy kooperatsııasyn damytý úshin 2500 AEK (bıyl – 8 625 000 teńge) jáne 8000 AEK (27 600 000 teńge) deıin.
– Mıkrokredıtter berý qashan bastalady?
– Biz bul jumysty osy jyldyń mamyr aıynda bastaýdy josparlap otyrmyz.
Aýyl halqynyń tabysyn arttyrý boıynsha pılottyq joba alǵash ret 2019 jyly Jambyl oblysynda bastaldy. Memleket basshysy bul baǵdarlamany búkil Qazaqstan boıynsha Úkimettiń keńeıtilgen otyrysynda aýqymdy etýdi tapsyrdy.
