Qaraǵandy oblysynda jappaı aǵash otyrǵyzý aktsııasy ótti

QARAǴANDY. QazAqparat – Qaraǵandy oblysynda bir kúnde 6 500 jasyl jelek paıda boldy. Qala men aýdandardyń myńdaǵan turǵyny aǵash otyrǵyzý boıynsha respýblıkalyq aktsııaǵa qatysty, dep habarlaıdy QazAqparat tilshisi.

Qaraǵandyda salynyp jatqan trıatlon-park aýmaǵyn kógaldandyrý týraly sheshim qabyldanǵan bolatyn. Búgin munda 1500 qylqan japyraqty jáne japyraqty aǵashtar otyrǵyzyldy. Olardy egýge oblys ákimi Jeńis Qasymbek, onyń orynbasarlary, óńirlik basqarmalar basshylary, sportshylar, qoǵamdyq uıymdardyń, kásiporyndardyń ókilderi, depýtattar qatysty.

Esterińizge sala keteıik, trıatlon-park «Rýhanı jańǵyrý» baǵdarlamasy boıynsha «Kógildir toǵandar» men Ońtústik-Shyǵys shaǵyn aýdandarynyń aralyǵynda salynýda. Bul nysan jeke qurylys kompanııasynyń qalaǵa jasap otyrǵan syılyǵy. Joba bastamashylary «Trıatlon parkin birge quramyz» aktsııasyn jarııalady. Munda kez kelgen adam óz aǵashyn otyrǵyza alady. Aýmaqty kógaldandyrý úshin qaraǵaı, qaıyń, jóke, shaǵan aǵashtary tańdaldy.

«Aktsııanyń maqsaty – óńirdi kógaldandyrý ǵana emes, sonymen qatar turǵyndardyń tabıǵatqa degen qamqorlyǵyn arttyrý. Biz árbir aǵashty, árbir butany baǵalaýymyz kerek. Ekologııalyq senbilikke úsh myńǵa jýyq adam qatysty. Osyndaı aktsııalar Qaraǵandy saıabaqtary men gúlzarlarynda, oblystyń basqa qalalary men aýdandarynda ótedi», - dedi Qaraǵandy oblysynyń Tabıǵı resýrstar jáne tabıǵatty paıdalanýdy retteý basqarmasynyń basshysy Rýslan Tólepbaev.

Munda fýtbol, trenajer jáne street workout alańdary jabdyqtalǵan. Kóldiń aınalasynda júgirýge jáne velosıped tebýge arnalǵan jolaqtar jasaldy.

Al Olımpıadalyq Dańq alleıasynda alǵashqy tórt juldyz paıda boldy. Olar ataqty sportshylar – Gennadıı Golovkın, Serik Sápıev, Dmıtrıı Karpov jáne Elmıra Syzdyqovanyń qurmetine ornatyldy.

Trıatlon parkiniń qurylysy jalǵasýda. Aldaǵy ýaqytta basketbol, tennıs, shahmat jáne basqa da sport túrleri boıynsha jańa sport alańdaryn jabdyqtaý josparlanýda.

Bolashaqta munda trıatlonnan álemdik deńgeıdegi jarystar ótkizýge bolady.

Nysan tapsyrylǵannan keıin Mádenıet, demalys saıabaqtary jáne gúlzarlar basqarmasynyń balansyna beriledi.