Qaraǵandy oblysynda pandemııadan qaıtys bolǵan dárigerge eskertkish ornatyldy
2022 jylǵy 12 maýsym 19:50

Qaraǵandy oblysynda pandemııadan qaıtys bolǵan dárigerge eskertkish ornatyldy

QARAǴANDY. QazAqparat – Qaraǵandy oblysy Buqar Jyraý aýdanynyń Botaqara kentindegi sanıtarııalyq-epıdemıologııalyq baqylaý basqarmasynyń ǵımaratynda pandemııa kezinde qaıtys bolǵan sanıtarlyq dáriger Baqbergen Aıjigitovty eske alýǵa arnalǵan memorıaldyq taqta ornatyldy, dep habarlaıdy QazAqparat tilshisi.

«Meniń aǵam janashyr jáne aqkóńil adam bolatyn. Jerlesterimizge ony eske alǵany úshin alǵysymyzdy bildiremiz», – dedi marqumnyń baýyry Marat Aldabergenov memorıaldyq taqtany ashý kezinde.

Marqumdy onyń áriptesteri de jyly sózben eske alady.

«Biz onymen birge 30 jylǵa jýyq jumys jasadyq. Pandemııa bastalǵan kezde ol Nur-Sultandaǵy blokposttarda jumys isteýge ketti. Osydan keıin ol kúrdeli epıdýchastkelerde boldy. Biz tipti onyń ortamyzdan erte ketip qalatynyn elestete almadyq. Qazir onyń isin balasy jalǵastyryp júr. Ol bizben birge jumys isteıdi», – deıdi Gúlbaram Otynshına.

Baqbergen Aıjigitov 2020 jyldyń jazynda qaıtys boldy. Ol 30 jyldan astam sanıtarlyq-epıdemıologııalyq qyzmette jumys istedi. Buqar jyraý aýdandyq sanqyzmet basqarmasynyń bas mamany boldy.

Pandemııa órship turǵanda óziniń qyzmettik mindetin oryndaı otyryp, naǵyz qaýipti aýmaqtarda jumys istedi. Mobıldi toptardyń jumysyna, reıdterge qatysty, blokposttarda kezekshilik etti.

2020 jylǵy shildede Memleket basshysy Qasym-Jomart Toqaev Baqbergen Aıjigitovty qyzmettik boryshyn úlgili atqarǵany, halyqtyń densaýlyǵyn saqtaý jónindegi qajyrly eńbegi úshin qaıtys bolǵannan keıin «Parasat» ordenimen marapattaý týraly Jarlyqqa qol qoıdy. Sondaı-aq, ol qaıtys bolǵannan keıin «Halyq alǵysy» medalimen marapattalǵan.


Uqsas jańalyqtar
Seriktester jańalyqtary

Jańalyqtar

Úrdis

MURAǴAT