Valıýta baǵamdary:
    usd/kzt 478.01 eur/kzt 488.81

    rub/kzt 7.91 cny/kzt 70.76
Aýa raıy:
Nur-Sultan: 1 °S
Almaty: 15 °S

Qaraǵandy oblysynda orman men dalaly alqap órtenip jatyr

2022 jylǵy 22 maýsym 20:05

QARAǴANDY. QazAqparat – Qaraǵandy oblysynda orman men dala alqaptary órtenip jatyr. Jalyn Qarqaraly jáne Buqar Jyraý aýdandarynyń aýmaǵyn sharpyǵan. Oqıǵa oryndarynda 300-ge jýyq adam, 44 tehnıka jáne 2 tikushaq jumys istep jatyr, dep habarlaıdy QazAqparat tilshisi.

Qarqaraly aýdanyndaǵy Qý ormanshylyǵynyń aýmaǵyndaǵy órtti joıýǵa Qaraǵandy oblysy Tótenshe jaǵdaılar departamentiniń, ormandar men janýarlar dúnıesin qorǵaý jónindegi Qý sharýashylyǵynyń, jergilikti atqarýshy organdardyń, órtke qarsy erikti qurylymdardyń, jergilikti polıtsııa qyzmetiniń, TJM «Qazavıaqutqarý» AQ, «Qazavıaormanqorǵaý» RMQK, «Altaı Polımetaly» JShS-nyń kúshteri men quraldary jumyldyryldy.

Órt ornynda barlyǵy 280 adam, 44 birlik tehnıka, 2 tikushaq jumys istep jatyr.

TJM «Qazavıaqutqarý» AQ avıatsııasynyń kómegimen sý shashý jumystary jalǵasýda. 22 maýsym saǵat 17:00-degi jaǵdaı boıynsha 12 ret sý shashyldy.

«Qolǵaalynǵan sharalardyń arqasynda aldyn ala boljam boıynsha 250 ga alańda órt aýyzdyqtaldy. Taýly jerler, dalany tútin basýy, jel baǵytynyń ózgerýi órtti sóndirýdi qıyndatyp otyr. Lapyldap janyp jatqan jerler joq. Tek butalar men shópter byqsyp jatyr. Qazirgi ýaqytta tútin shyǵyp jatqan jerlerdi joıý jumystary júrgizilip jatyr. Eldi mekenderge qaýip joq. Qaza bolǵandar men zardap shekkender joq», - dep habarlady Qaraǵandy oblysy TJD baspasóz qyzmeti.

Sondaı-aq, Buqar Jyraý aýdany aýmaǵyndaǵy Belaǵash orman sharýashylyǵynda 100 ga jáne 1,5 ga orman alqaptarynda tutanǵan qurǵaq shópti sóndirý jumystary júrgizildi. Órt 22 maýsym kúni tańerteń aýyzdyqtaldy. Zardaptardy joıý boıynsha jumys jalǵasýda. Oqıǵa ornyna Qaraǵandy oblysy TJD-niń 142 qyzmetkeri men 27 tehnıkasy, QR TJM-niń 52859 áskerı bólimi, órtke qarsy erikti qurylymdary, orman sharýashylyǵy jáne jergilikti atqarýshy organdary jumyldyryldy.

Aıta ketý kerek, osydan eki kún buryn Qarqaraly aýdanynda, Qoıandy aýylynan soltústik-batysqa qaraı 20 shaqyrym jerde qurǵaq shóptiń órtengeni týraly habarlama kelip túsken. Órtti sóndirýge 44 qyzmetker men 7 tehnıka jumyldyryldy. Sondaı-aq tabıǵı apatpen kúreske 13 jumysshy men 3 birlik tehnıkadan turatyn erikti órtke qarsy quramalar kómektesti.

Aldyn ala málimetter boıynsha jalyn 1500 gektardan astam aýmaqty sharpyǵan. Bir táýlikten keıin qutqarýshylar órtti sóndirdi.


Avtor:

Agata Mýhamedjanova

Novostı po teme
Uqsas jańalyqtar