Qapshaǵaı qalasyna Qonaevtyń aty saltanatty túrde berildi
2022 jylǵy 8 mamyr 20:33

Qapshaǵaı qalasyna Qonaevtyń aty saltanatty túrde berildi

TALDYQORǴAN. QazAqparat - Qapshaǵaı qalasyna Dinmuhamed Qonaevtyń esimi berilýine baılanysty shaharda saltanatty sharalar uıymdastyryldy, - dep habarlaıdy QazAqparat tilshisi.

«Dinmuhamed Ahmetuly Qonaev elimizde 43 qalanyń salynýyna atsalysty. Sonyń 7-eýi Almaty oblysyndaǵy Esik, Qaskeleń, Sarqan, Talǵar, Úsharal, Úshtóbe, sosyn osy Qapshaǵaı, ıaǵnı qazirgi Qonaev qalasy. Sondyqtan, ózi saldyrǵan qalalardyń birine atyn berý – laıyqty qurmet kórsetý dep bilemiz. Memleket basshysynyń bastamasymen, qala halqynyń qoldaýymen tarıhı ádilettilik qalpyna keltirildi. Qalany qalyptastyrý, GES pen sý qoımasyn salý – Dinmuhamed Qonaevtyń tikeleı eńbegi. Sonymen birge, Prezıdenttiń Jarlyǵyna sáıkes oblys ekige bólingennen keıin Almaty oblysynyń ortalyǵy - Qonaev qalasy bolady dep bekitildi. Bul qalanyń damýyna jańa serpin berip, megapolıstiń mańaıyndaǵy aýdandardyń qordalanǵan áleýmettik máselelerin tıimdi sheshýge múmkindik jasaıdy», - dedi saltanatty jıynda sóz alǵan oblys ákimi Qanat Bozymbaev.


Oblys basshysynyń aıtýynsha, aldaǵy ýaqytta Qonaev pen Almaty qalalarynyń arasyn seriktes qalalar jalǵaıdy. Qazir qajetti ınfraqurylym jasalǵan, qala odan ári de damıdy. Bul rette jobanyń jańartylǵan tujyrymdamasynda qala ekonomıkasynyń ónerkásiptik, týrıstik, oıyn-saýyqtyq baǵyttaryn damytý qarastyrylǵan. Demek, bıýdjet túsimi men tartylatyn ınvestıtsııa kólemi artady degen sóz.


«Qalaǵa jańa ataý berilip, jańa mártebege ıe bolýy – ózgeristiń basy. Qazirdiń ózinde turaqty jumys oryndaryn ashý, turǵyn úı qoryn kóbeıtý, qalanyń ınfraqurylymmen qamtylýy men kórkeıtilýin keshendi túrde qarastyratyn jospar ázirlenip jatyr. Qalanyń ekonomıkalyq, áleýmettik, mádenı, qaı jaǵynan bolsyn jańa tarıhy bastaldy dep senimmen aıtýǵa bolady. Qonaev qalasynyń turǵyndary da ózgeristerge belsene atsalysady dep senemiz», - degen Qanat Bozymbaev kópshilikti Jeńis kúnimen jáne qala ataýynyń aýysýymen quttyqtady.


Aıta keteıik, sharaǵa memleket jáne qoǵam qaıratkeriniń týǵan-týystary, zamandastary men áriptesteri, Parlament Senaty men Májilisiniń depýtattary, ǵylym men shyǵarmashylyq ıeleri, ardagerler men jergilikti turǵyndar qatysty.


Aldymen, qalanyń ortalyq alańyndaǵy D. Qonaev eskertkishine gúl shoqtary qoıyldy. Munda Almatydaǵy D. Qonaev atyndaǵy mýzeı eksponattarynyń kóshpeli kórmesi ótti. Onda Dinmuhamed Ahmetulynyń jeke zattary men fotokórme ornalastyrylǵan. Shara merekelik kontsertke ulasty.

Eske salsaq, QR Prezıdenti Qasym-Jomart Toqaev Qazaqstan halqyna Joldaýynda Qapshaǵaıǵa Qonaevtyń esimin berý kerek dep usynys aıtylsa, bul pikirge qosylatynyn jetkizdi. Qapshaǵaı qalasyna Dinmuhamed Qonaev esimin berý usynysy biraýyzdan maquldandy. Qapshaǵaı qalasyna Qonaev aty resmı túrde berildi.


Uqsas jańalyqtar
Seriktester jańalyqtary

Jańalyqtar

Úrdis

MURAǴAT