Kapıtal elge qaıtarylǵanda raqymshylyq jasalmaq – Investıtsııalyq saıasat tujyrymdamasy tanystyryldy
2022 jylǵy 23 maýsym 10:05

Kapıtal elge qaıtarylǵanda raqymshylyq jasalmaq – Investıtsııalyq saıasat tujyrymdamasy tanystyryldy

NUR-SULTAN. QazAqparat – Búgin Úkimet otyrysynda QR Ulttyq ekonomıka birinshi vıtse-mınıstri Tımýr Jaqsylyqov elimizdiń jańa ınvestıtsııalyq saıasatynyń negizgi baǵyttaryn atady, dep habarlaıdy QazAqparat tilshisi.

«Eldiń odan ári ınvestıtsııalyq damýy barlyq ınvestıtsııalar úshin, ásirese eńbek ónimdiligi men eksportqa baǵdarlanǵan ınvestıtsııalar úshin tıisti orta qurýmen baılanysty.

Osyǵan oraı Tujyrymdama jobasy negizgi úsh baǵyt boıynsha qurylymdalǵan júıeli sıpattaǵy 45 naqty is-sharadan turatyn is-qımyl josparyn qamtıdy.

Birinshi – ashyq jáne boljamdy ınvestıtsııalyq saıasatty qalyptastyrýǵa baǵyttalatyn ınvestıtsııalyq ekojúıeni odan ári damytý. Osy baǵyt aıasynda quqyqtyq rejımdi jetildirý, sot tóreligine senim men aqparatqa qol jetkizýdi jaqsartý, vedomstvoaralyq úılestirýdi nyǵaıtý, sondaı-aq jobalar men óndirýshilerdi ilgeriletýdiń tsıfrlyq quraldaryn jasaý arqyly ınvestorlar úshin ınstıtýtsıonaldyq orta men ınfraqurylym jetildiriletin bolady», - dedi ol 2026 jylǵa deıingi Investıtsııalyq saıasat tujyrymdamasynyń jobasyn tanystyra kele.

Birinshi vıtse-mınıstrdiń atap ótýinshe, ekinshi baǵyt – naryqtarǵa qoljetimdilikti jaqsartý jáne kompanııalardyń qalyptasýy úshin turaqty jáne aýyrtpalyq salynbaıtyn jaǵdaılar jasaýdy kózdeıtin jeke sektordyń ınvestıtsııalyq belsendiliginiń ósýine járdemdesý. Onyń aıasynda mynadaı is-sharalar josparlanǵan:

- bankterdi, memleket qatysatyn qorlardy, kvazımemlekettik sektor kompanııalaryn jáne taǵy basqasyn qosa alǵanda, strategııalyq jáne bólshek ınvestorlar tarapynan qarjylandyrýdy, onyń ishinde áriptestik qarjylandyrýdy tartý;

- qazaqstandyq qor naryǵyn kapıtaldyń halyqaralyq naryqtaryna ıntegratsııalaýdy jáne ilgeriletýdi jáne syrtqy portfeldik ınvestıtsııalar tartý;

- memlekettik-jekeshelik áriptestiktegi tásilderdi keshendi reformalaýdy eskerý;

- ESG standarttarynyń qoldanýdyń ósip kele jatqan úrdisiniń mańyzdylyǵyn eskere otyryp, ornyqty damý jobalaryna ınvestıtsııalar tartýdy yntalandyrý.

Al úshinshi baǵyt – ekonomıkanyń ınvestıtsııalyq áleýetin ashý.

Bul baǵytta mynadaı is-sharalardy iske asyrý kózdelgen:

- tıimsiz menshik ıelerin aýystyra otyryp, dármensiz kásiporyndardyń naryqtan jedel shyǵýy úshin bankrottyq rásimderin ońaılatý;

- kapıtaldar el ekonomıkasyna qaıtarylǵan jaǵdaıda olarǵa raqymshylyq jasaý;

- qazaqstandyq kompanııalardy sheteldik ıýrısdıktsııalar men ofshorlyq aımaqtardan AHQO ıýrısdıktsııasyna aýystyrý jáne taǵy basqalary.

«Jalpy tujyrymdama jańa ınvestıtsııalyq tsıkldy qalyptastyrýǵa jáne jańa trendterdi eskere otyryp, ınvestıtsııalar tartý saıasatyn qaıta qaraýǵa múmkindik beredi. Nátıjesinde, jahandyq energetıkalyq jáne tehnologııalyq kóshý ESG talaptaryn kúsheıtý jaǵdaılarynda eldiń tartymdylyǵyn arttyrýǵa baǵyttalǵan júıeli sharalar iske asyrylatyn bolady», - dedi Tımýr Jaqsylyqov.


Uqsas jańalyqtar
Seriktester jańalyqtary

Jańalyqtar

Úrdis

MURAǴAT