Qanysh Sátbaev ashqan ǵylymı kitaphana qyzmetkerleriniń aılyǵyn kóterý usynyldy
2022 jylǵy 22 maýsym 12:34

Qanysh Sátbaev ashqan ǵylymı kitaphana qyzmetkerleriniń aılyǵyn kóterý usynyldy

NUR-SULTAN. QazAqparat –Májilis depýtaty Maqpal Tájmaǵambetova Qanysh Sátbaev ashqan ǵylymı kitaphana qyzmetkerleriniń aılyǵyn kóterýdi usyndy, dep habarlaıdy QazAqparat tilshisi.

«Qazaqstandaǵy eń iri kitaptar qory saqtalǵan, akademık Qanysh Sátbaev ashqan ǵylymı kitaphana jaıly aıtpaı ketýge bolmas. Búginde bul kitaphanada jalpy sany 6 mıllıon basylym bolsa, sonyń ishinde shet tilderdegi qordyń sany bir mıllıonnan asady. Ǵalymdardyń aıtýynsha, dál mundaı baı kitap qory búkil Ortalyq Azııada joq. Munda arab, parsy, shaǵataı, qytaı jáne basqa tildegi eńbekter jeterlik. Sondyqtan, Ortalyq ǵylymı kitaphana respýblıkalyq qana emes, halyqaralyq deńgeıde oqyrmanǵa qyzmet kórsetýge laıyq», - degen Májilis ókili Ózbekstannyń osyǵan uqsas máseledegi tájirıbesin mysalǵa keltirdi.

«Ózbekstannyń Bırýnı atyndaǵy Shyǵystaný ınstıtýtynda qoljazba qoryna erekshe jaǵdaı jasalǵan. Al Irandaǵy 12 qabattan turatyn Ulttyq arhıv jáne kitaphana el prezıdentine tikeleı baǵynady, Úndistanda da solaı.

Al bizdegi ǵylymı kitaphana asa baı ári qundy kitap qory bola tura, búginde Ǵylym komıtetiniń bir bólimshesi retinde ǵana jumys istep tur», - dedi depýtat.

Onyń sózinshe, atalǵan mekemedegi qyzmetkerlerdiń jalaqysy ózge mekemelerdegi kitaphanashy áriptesterinen de tómen.

«Qazirgi tańda munda 7 bólim bar. 50 shaqty qyzmetker jumys isteıdi. Buryn 200 adam qyzmet etken. Sırek qorda qundy dúnıeler kóp, alaıda ony zerttep, zerdeleıtin maman joq», - degen Maqpal Tájmaǵambetova Úkimettiń aldyna birneshe usynys qoıdy.

«Birinshi. Ǵylymı kitaphana derbes mekeme bolýǵa tıis. Ǵylym jáne joǵary bilim mınıstirligi Ulttyq ǵylym akademııasy aıasynda Ortalyq ǵylymı kitaphana mártebesi qaıta berilýi kerek. Osyǵan sáıkes, qyzmetkerlerdiń jalaqysyn qaıta qarastyryp, halyqaralyq baılanystardy jıilendirý mańyzdy», - depýtat.

Sondaı-aq onyń aıtýynsha, ǵylymı kitaphanada arnaıy restavratsııa bólimi jáne zerthana ashylýǵa tıis.

«Qazaq halqynyń tarıhyna qatysty qundy derekter shoǵyrlanǵan ǵylymı kitaphana qoryn jan-jaqty zertteý, ǵylymı aınalymǵa engizý isi arnaıy baǵdarlama aıasynda júrgizilýi tıis. Sarapshylar sırek kezdesetin kitaptar men kóne qoljazbalar qorynyń qunyn qaıta baǵalaýy kerek.

Úshinshi. Tsıfrlandyrý jumysy qarqyndy júrgizilýi tıis. Sırek kitaptar men kóne qoljazbalar bóliminiń erejesi boıynsha oqyrmanǵa qundy basylymdardyń dıdjıtal nusqasy berilýi kerek.

Osy atalǵan usynystardy qarap, zańnamada belgilengen merzim ishinde jazbasha jaýap berýińizdi suraımyn», - dedi Májilis depýtaty.

Buǵan deıin kitaphanashylar arasynda ótken saýalnamaǵa qatysýshylardyń 88 paıyzy aılyqtyń tómendigin saladaǵy basty problema retinde ataǵan bolatyn.


Uqsas jańalyqtar
Seriktester jańalyqtary

Jańalyqtar

Úrdis

MURAǴAT