Qanttyń ortasha baǵasy shamamen 480-490 teńge bolýy tıis – Úkimet basshysy
2022 jylǵy 25 maýsym 16:16

Qanttyń ortasha baǵasy shamamen 480-490 teńge bolýy tıis – Úkimet basshysy

NUR-SULTAN. QazAqparat – Qazirgi suranysqa baılanysty jeke kásipkerler qant baǵasyn qoldan kóterip otyr. Úkimettiń tsıfrlyq keńsesinde ótken áleýmettik mańyzy bar azyq-túlik taýarlarynyń baǵasyn ustap turý jónindegi keńeste Álıhan Smaıylov máseleni retteýdi tapsyrdy, dep habarlaıdy QazAqparat Premer-Mınıstrdiń resmı saıtyna silteme jasap.

«Aýyl sharýashylyǵy mınıstrliginiń derekterine sáıkes, qant qory 100 myń tonnadan asady, al aıyna tutyný – 59 myń tonna. Demek, qor jetkilikti. Biraq, úı janyndaǵy dúkenderde qant 700-800 teńgeden satylady. Bul – suranysty paıdalanyp, ústeme aqy qoıyp otyrǵan jeke tulǵalardyń zańsyz kásipkerlik qyzmetiniń «nátıjesi». Jalpy, qanttyń ortasha baǵasy shamamen 480-490 teńge/kg bolýy tıis. Muny retke keltirý kerek», - dep tapsyrdy Úkimet basshysy.

Salalyq komıtet málimetinshe, bólshek saýda nysandarynyń ruqsat etilgen ústemeni 15%-dan asyrmaýyn ákimdikter baqylap otyr. Keıingi aptalarda reıdtik is-sharalar úı janyndaǵy 42,6 myń dúkenge (84,7%) júrgizilgen. Nátıjesinde 712 zań buzýshylyq anyqtaldy, olar boıynsha qajetti sharalar qabyldandy.

Saýda jáne ıntegratsııa mınıstrligi Saýda komıtetiniń tóraǵasy Erjan Qazanbaev saýda ústemesin arttyrý faktilerin anyqtaý jáne zańnamada kózdelgen sharalardy qabyldaý úshin monopolııaǵa qarsy organdar men JAO-ǵa elektrondyq shot-faktýralardyń derekterin jiberýge múmkindik beretin memlekettik organdardyń birlesken buıryǵyn ázirleýdi usyndy.

Sondaı-aq, ol qazirgi ahýal jáne baǵany turaqtandyrý boıynsha qabyldanyp jatqan sharalar týraly baıandady. Jyl basynan beri baǵa 17,1%-ǵa kóterilgen. Atap aıtqanda, pııaz, qyryqqabat, qant, kartop, sábiz, qaraqumyq baǵasy qymbattaǵan. Óńirler boıynsha baǵa Jambyl jáne Mańǵystaý oblystarynda 18,7%-ǵa, Almaty oblysynda 18,6%, Nur-Sultan jáne Almaty qalalarynda 18,5% jáne Shymkent qalasynda 18%-ǵa ósken.

Atalyp ótkenindeı, jaqyn shetel naryqtarynda da azyq-túlik taýarlary baǵasynyń ósýi boıynsha jaǵdaı osyndaı. Máselen, Reseıde jyl basynan beri azyq-túlik baǵasynyń ortasha ósýi shamamen 40%, Ózbekstanda 48% boldy.

Aýyl sharýashylyǵy mınıstrliginiń derekteri boıynsha, qazirgi ýaqytta elimizde sıyr etin (22 292 tonna), qus etin (19 600 tonna), kartopty (93 749 tonna), undy (118 506 tonna), sútti (59 640 tonna) jáne basqasyn qosa alǵanda, 607 myń tonna kóleminde negizgi azyq-túlik qory bar.


Uqsas jańalyqtar

Jańalyqtar

Úrdis

MURAǴAT