Qańtardaǵy jappaı tártipsizdikke qatysty 243 adam sottaldy
2022 jylǵy 25 sáýir 15:11

Qańtardaǵy jappaı tártipsizdikke qatysty 243 adam sottaldy

NUR-SULTAN. QazAqparat – Qańtar oqıǵasyna qatysty 585 kúdikti qamaýda otyr. Bul týraly Ortalyq kommýnıkatsııalar qyzmetinde QR Bas prokýratýrasy 1-qyzmet basshysynyń orynbasary Eldos Qılymjanov aıtty, dep habarlaıdy QazAqparat tilshisi.

«Qańtar oqıǵasy boıynsha jalpy 265 qylmystyq is sotqa joldanyp, 243 adam sottaldy. Qazirgi ýaqytta 585 kúdikti qamaýda otyr. Atalǵan adamdar qıratý, ǵımarattardy órteý, qarý jymqyrý, memlekettik jáne quqyq qorǵaý organdary ǵımarattaryna qarýly shabýyl jáne basqa qylmystarǵa belsendi túrde qatysqan. Árbir qamalǵan kúdikti boıynsha olardyń osy qylmystarǵa qatysy bar ekenin dáleldeıtin jetkilikti málimet bar. Buǵan deıin biz Almaty qalasy áýejaıyna shabýyl jasalǵanyn habarlaǵan bolatynbyz, munda keıbir qylmyskerlerdiń rólin túsindirgim keledi», - dedi E. Qılymjanov.

Osy oraıda ol 5 qańtarda N. esimdi azamat bir top adammen birge Almaty qalasy áýejaıynyń ushý-qoný jolaǵynyń jaryǵyn óshirgenin aıtty.

«Osy rette N. óziniń áreketterimen strategııalyq obektiniń qyzmetin toqtatty, saldarynan jolaýshylar mingen ushaqtar ushyp kete almady jáne toqtan ajyratylǵan ushý-qoný jolaǵynda 10 saǵattan artyq turýǵa májbúr boldy. Osy ýaqytta qarýly top Almaty áýejaıynyń ǵımaratyn qıratyp, tonady. N-niń is-áreketteri terrorızm aktisi, ıaǵnı Qylmystyq kodekstiń 255-babymen saralandy. Onyń qylmystarǵa qatysy bary jınalǵan dáleldemelermen rastaldy», - dedi Bas prokýratýra ókili.

Budan buryn habarlanǵandaı, Qańtar oqıǵasy boıynsha tergeý organdarynyń is júrgizýinde 5 041 qylmystyq is bar.


Seriktester jańalyqtary

Jańalyqtar

Úrdis

MURAǴAT