Qańtardaǵy tártipsizdik: QR ІІM 10,5 myń adamnan jaýap aldy
2022 jylǵy 7 aqpan 20:31

Qańtardaǵy tártipsizdik: QR ІІM 10,5 myń adamnan jaýap aldy

NUR-SULTAN. QazAqparat – Qańtar oqıǵasyna qatysty 10,5 myń adamnan kýágerler men jábirlenýshiler retinde jaýap alyndy. Bul týraly QR ІІM Tergeý departamentiniń bastyǵy Sanjar Ádilov aıtty, dep habarlaıdy QazAqparat tilshisi.

«Іshki ister organdarynyń tergeýshileri arnaıy prokýrorlarmen tyǵyz is-qımyl jasaı otyryp, qańtar oqıǵalarynyń sebepterin anyqtaý, qylmys izderin alý jáne bekitý, sondaı-aq qajetti dáleldemeler bazasyn jınaý jumystaryn jalǵastyrýda. Bul jumysqa barlyǵy 200-den astam tergeýshi tartylǵan.

Buryn habarlanǵandaı, qazirgi ýaqytta barlyq zaqymdanǵan nysandy tekserý aıaqtaldy. Olardyń sany 1,5 myńnan asady jáne 760-tan astam avtokólik bar», - dedi ol Ortalyq kommýnıkatsııalar qyzmetindegi brıfıng barysynda.

Onyń atap ótýinshe, 1,7 myńnan astam sot saraptamasy taǵaıyndaldy. Kýágerler men jábirlenýshiler retinde 10,5 myń adamnan jaýap alyndy.

«Júrgizilip jatqan jumystardyń nátıjesinde qylmyskerler men jasyrý oryndarynan 828 birlik qarý, 18 myńnan astam oq-dári jáne 286 arnaıy qural tárkilendi. Sonymen qatar, 65 dana qarý erikti túrde tapsyryldy», - dedi Sanjar Ádilov.


Uqsas jańalyqtar
Seriktester jańalyqtary

Jańalyqtar

Úrdis

MURAǴAT