Qańtarda qaza tapqandardyń tizimin ǵana emes, neden ólgenin, kim kináli ekenin qosa jarııalaý kerek - Ázimova
2022 jylǵy 1 shilde 17:17

Qańtarda qaza tapqandardyń tizimin ǵana emes, neden ólgenin, kim kináli ekenin qosa jarııalaý kerek - Ázimova

NUR-SULTAN. QazAqparat – Bıyl qańtarda bolǵan jappaı tártipsizdik kezinde qaza bolǵan jáne zardap shekken jandardyń tizimi shamamen qashan jarııalanatyny belgili boldy, dep habarlaıdy QazAqparat tilshisi.

«Biz qańtar oqıǵasynda qaıtys bolǵandar máselesin protsess bastala sala kóterdik. Búginde bul másele kún tártibinen túsken emes. Qaıtys bolǵandardyń tizimine kelsek, Bas prokýratýranyń málimetine sáıkes, tergeý aıaqtalýy kerek, tizim sodan keıin ǵana jarııalanady. Bizdiń oıymyzsha, jekelegen aımaqtar boıynsha tergeý nátıjesi belgili ekenin eskere otyryp, qaıtys bolǵandar men zardap shekkenderdiń tizimin kezeń-kezeńimen jarııalaǵan durys bolar edi. Biraq men úshin mańyzdysy tizim ǵana emes. Ondaǵy adamdardyń mártebesi, ólimniń sebebi týraly aqparat birge berilýi mańyzdy. Sondyqtan qur tizimdi jarııalap qana qoımaı, adam óliminiń sebebi men oǵan kim kináli ekendigi týraly da aıtý kerek», - dedi adam quqyqtary jónindegi ýákil Elvıra Ázimova ortalyq kommýnıkatsııalar qyzmeti alańynda ótken dóńgelek ústel barysynda.

Sondaı-aq, ýákil Bas prokýratýradan qańtar oqıǵasy kezinde qaıtys bolǵan jáne zardap shekkenderge qatysty tizim men tolyq aqparatty talap etetinin aıtty.

Atalǵan jaıtqa qatysty QR Bas prokýratýrasynyń normashyǵarmashylyq qyzmetti úılestirý departamentiniń basshysy Almaz Muhamedjanov túsinik berip ótti.

«Birinshiden, qylmystyq isterdi tergeý merzimi shekteýli. ıAǵnı qylmystyq is júrgizý kodeksinde tıisti shekteýler bar. Meniń oıymsha, qazir qańtar oqıǵasyna qatysty qylmystyq ister máresine jetip qaldy. Qajetti saraptamalar da aıaqtalýy kerek. Kópke sozylmaıdy. Múmkin, osy toqsanda naqty aqparat bolyp qalar. Ol týraly bizdiń resmı ókilderimiz qoǵamǵa jetkizedi. Aqparat tek qaza tapqandar men zardap shekkenderge ǵana emes, barlyq qylmystyq iske qatysty», - deıdi ol.

Buǵan deıin Adam quqyqtary jónindegi ýákil Elvıra Ázimova qańtar oqıǵasynan keıin ustalyp, azaptaýdan ólgen adam sanyna qatysty óz ýájin aıtqan edi.


Jańalyqtar

Úrdis

MURAǴAT