Jańalyqtar  >

Qańtarda 20 óńirden bir-bir Senat depýtaty saılanady

2022 jylǵy 28 qarasha, 11:53
Qańtarda 20 óńirden bir-bir Senat depýtaty saılanady

ASTANA. QazAqparat – 2023 jyldyń 14 qańtarynda elimizdiń 20 óńirinen bir-bir Senat depýtatyn saılaý ótedi. Bul týraly QR Ortalyq saılaý komıssııasynyń tóraǵasy Nurlan Ábdirov aıtty, dep habarlaıdy QazAqparat tilshisi.

«Ózderińiz biletindeı, QR Konstıtýtsııasynyń 44-babyna, «Saılaý týraly» Konstıtýtsııalyq zańnyń 69-babyna sáıkes, Parlament Senaty depýtattarynyń bir bóligi, ıaǵnı, ár óńirden bir-birden saılanatyn depýtattar ókilettiginiń konstıtýtsııalyq merzimi 2023 jyly aıaqtalatyna baılanysty Memleket basshysynyń 26 qarashadaǵy №4 Jarlyǵymen QR Parlamenti Senaty depýtattarynyń kezekti saılaýy 2023 jylǵy 14 qańtarǵa taǵaıyndaldy. Osylaısha, elimizdiń Prezıdenti atap ótkendeı, Parlamenttiń joǵarǵy palatasy depýtattarynyń kezekti saılaýy konstıtýtsııalyq reformany naqty júzege asyrýdyń jalǵasy bolmaq. Óz ókilettigine saı Ortalyq saılaý komıssııasy Senat depýtattarynyń saılaýyn uıymdastyrý men ótkizýge basshylyq etedi. Osyǵan oraı 2023 jylǵy 14 qańtarǵa belgilengen Senat depýtattarynyń saılaýyn ázirleý men ótkizý jónindegi negizgi is-sharalardyń kúntizbelik josparynyń jobasy ázirlengen», - dep atap ótti búgin Nurlan Ábdirov OSK otyrysynda.

Osydan keıin atalǵan másele boıynsha baıandama jasaý úshin sóz OSK tóraǵasynyń orynbasary Konstantın Petrovke berildi.

Onyń atap ótýinshe, depýtattar saılaýyn Senat depýtattarynyń konstıtýtsııalyq ókilettigi merziminiń bitýine deıin keminde tórt aı qalǵanda taǵaıyndalady jáne ol konstıtýtsııalyq ókilettik merziminiń bitýinen keminde eki aı buryn ótkiziledi.

«Qazaqstan Respýblıkasynyń azamaty jáne onyń aýmaǵynda sońǵy on jyl boıy turaqty turyp jatqan adam Parlament depýtaty bola alady. Jasy otyzǵa tolǵan, joǵary bilimi jáne keminde bes jyl jumys stajy bar, tıisti aýmaǵynda keminde úsh jyl turaqty turyp jatqan adam Senat depýtaty bola alady», - dedi ol.


Uqsas jańalyqtar
Seriktester jańalyqtary

Jańalyqtar