Qańtar oqıǵasynda urlanǵan qarý-jaraq jasyrylǵan 120 oryn tabyldy
2022 jylǵy 30 maýsym 18:11

Qańtar oqıǵasynda urlanǵan qarý-jaraq jasyrylǵan 120 oryn tabyldy

NUR-SULTAN. QazAqparat – Qańtar oqıǵasy kezinde urlanǵan qarý jasyrylǵan 120 oryn tabyldy. Bul týraly QR ІІM Tergeý departamentiniń bastyǵy Sanjar Ádilov aıtty, dep habarlaıdy QazAqparat tilshisi.

«Azamattardyń qaýipsizdigin qamtamasyz etý - ishki ister organdarynyń negizgi mindetteriniń biri, osyǵan baılanysty buryn jappaı tártipsizdik barysynda urlanǵan qarýdy izdeý men alyp qoıý boıynsha maqsatty jedel-izdestirý is-sharalary jalǵasýda. Búgingi tańda 1640 qarý men 41 myńnan astam oq-dári anyqtalyp, zańsyz aınalymnan alyndy. Onyń ishinde 10 granata atqysh; 6 oq atqysh; 164 avtomat; 362 tapansha; 235 jaraqattaıtyn jáne gazdy qarý; 78 sýyq qarý bar. Tek ótken 2 apta ishinde 50-den astam qarý-jaraq alyndy. Qarýdy jasyryn saqtaýdyń 120 orny joıyldy», - dedi Sanjar Ádilov Ortalyq kommýnıkatsııalar qyzmetindegi brıfıng barysynda.

Mysaly, onyń aıtýynsha, 17 maýsymda Almaty qalasynda alańqaıda 7 granata, oqjatary tolyq «IJ» jaraqattaıtyn tapanshasy men oq-dári jasyrylǵan qarýdy zańsyz saqtaıtyn jer tabylǵan.

21 maýsymda Talǵar qalasynda 130-dan astam oq-dári men «Kalashnıkov» avtomaty alyndy. 22 maýsymda taǵy da Almaty qalasynda «Kalashnıkov» avtomaty, 2 ańshylyq myltyq, tútiksheleri bar «F-1» granatasy, 40 oq, 2 brondy keýdeshe, 2 radıostantsııa alyndy.

25 maýsymda Taraz qalasynda turǵyn massıvine jaqyn jerde sáıkestendirý nómirleri joıylǵan, «Makarov» júıesiniń báseńdetkishti tapanshasy, sıgnaldy revolver men pnevmatıkalyq tapansha, jaryq-dybys granatasy men ártúrli kalıbrli 60 oq qolǵa tústi.

26 maýsymda Taraz qalasynda «Baıkal» myltyǵy, «Strımer» tapanshasy men ártúrli kalıbrli 32 oq tabylyp alyndy.

«Júrgiziletin túsindirý jumysynyń nátıjesinde azamattar 212 qarýdy óz erkimen tapsyrdy», - dedi ol.


Uqsas jańalyqtar
Seriktester jańalyqtary

Jańalyqtar

Úrdis

MURAǴAT