Qańtar oqıǵasynda qaza bolǵan 13 adamnyń týystaryna qordan qarajat aýdarylady
2022 jylǵy 13 sáýir 16:09

Qańtar oqıǵasynda qaza bolǵan 13 adamnyń týystaryna qordan qarajat aýdarylady

NUR-SULTAN. QazAqparat – Qańtar oqıǵasynda jazataıym qaza bolǵandardyń týystaryna qarajat bólindi. Bul týraly «Qazaqstan halqyna» qoǵamdyq qory tóraǵasynyń orynbasary Lázzat Shyńǵysbaeva aıtty, dep habarlaıdy QazAqparat tilshisi.

«Búgingi tańda qaza tapqan 19 jáne aýyr jaralanǵan 106 Іshki ister mınıstrligi, Ulttyq qaýipsizdik komıteti qyzmetkerleriniń otbasy múshelerine jáne Qorǵanys mınıstrligi men Respýblıkalyq ulannyń áskerı qyzmetshilerine materıaldyq kómek kórsetildi. Jalpy soma 451 mln teńgeni qurady», - dedi L. Shyńǵysbaeva Ortalyq kommýnıkatsııalar qyzmetinde.

Sonymen qatar ol qańtar oqıǵasynda jazataıym qaza bolǵandardyń týystaryna qarajat bólingenin aıtty.

Qaza bolǵan úsh azamattyń otbasy múshelerine aqshalaı tólemder jiberildi, olardyń jazataıym oqıǵanyń qurbany ekenin quzyrly organ rastady. Sondaı-aq zardap shekken úsh balanyń jáne qaıtys bolǵan eki balanyń otbasylaryna aqshalaı tólemder jiberildi. Bul sanattaǵy japa shekkenderge tólengen jalpy tólem somasy 44 mln teńgeni qurady», - dedi qor ókili.

Onyń aıtýynsha, qazir qaza tapqan 13 beıbit turǵynnyń týystaryna aqsha aýdarý úshin aqparattar naqtylanyp jatyr.

Taratylǵan málimetke qaraǵanda, úsh aıda «Qazaqstan halqyna» qoǵamdyq qoryna 126,05 mlrd qarjy tústi.


Seriktester jańalyqtary

Jańalyqtar

Úrdis

MURAǴAT