Qańtar oqıǵasynan zardap shekken kásipkerlerdiń 95 paıyzy ótemaqysyn aldy
2022 jylǵy 3 mamyr 14:15

Qańtar oqıǵasynan zardap shekken kásipkerlerdiń 95 paıyzy ótemaqysyn aldy

ALMATY. QazAqparat- Almatyda qańtar aıyndaǵy oqıǵalardan keıin saýda jáne qyzmet kórsetý salasy qaıta qalpyna keldi. Birinshi toqsannyń qorytyndysy boıynsha bólshek saýda kólemi - 737,8 mlrd teńge, kóterme saýda aınalymy - 2,4 trln teńgege jetti, dep habarlaıdy QazAqparat tilshisi.

Bul týraly Almaty qalalyq kásipkerlik jáne ınvestıtsııalar basqarmasynyń basshysy Erkebulan Orazalın brıfıngte aıtty.

«І toqsannyń qorytyndysy boıynsha Almatynyń ekonomıkalyq ósý qarqyny men iskerlik belsendiligi qalpyna kele bastady. Máselen, osy jyldyń 3 aıynda qala 19,18% ósýge qoljetkize otyryp, 248 mlrd teńgeden astam ınvestıtsııa tartyldy. Ónerkásip ónimin óndirý kólemi oń serpin kórsetip otyr. І toqsanda Almatyda 387,8 mlrd teńgeniń ónimi óndirilip, 15 paıyzǵa artqan. Óńdeý ónerkásibi 18%-ǵa artqanyn erekshe atap ótý kerek. Bul eń aldymen mashına jasaýdyń belsendi damýyna, ıaǵnı 1,7 ese ósýine baılanysty», – dedi spıker.

Sonymen qatar, ol qańtardaǵy oqıǵalardan keıin qaladaǵy saýda jáne qyzmet kórsetý salasy da qaıta qalpyna kele bastaǵanyn atap ótti.

І toqsannyń qorytyndysy boıynsha bólshek saýda kólemi 737,8 mlrd teńge bolsa, kóterme saýda aınalymy 2,4 trln teńgege jetti.

«Óńirlik komıssııa bızneske keltirilgen zalaldy óteýge kirisken bolatyn, búgingi tańda komıssııa jalpy somasy 11 mlrd teńgeden astam 1499 ótinimdi maquldady. Zardap shekken kásipkerlerdiń 95 paıyzy ótemaqysyn aldy, qazir olar jumystaryn istep jatyr», –dedi Erkebulan Orazalın.

Qazir komıssııanyń qaraýynda saraptama júrgizýdi, JSQ ázirleýdi jáne rastaıtyn qujattardy qalpyna keltirýdi talap etetin eń kúrdeli jaǵdaılar qaldy.

«Bızneske kelgen zalaldy óteý jumystaryn bıylǵy jyldyń mamyr aıynda aıaqtaýdy josparlap otyrmyz»,- dedi ol.


Seriktester jańalyqtary

Jańalyqtar

Úrdis

MURAǴAT