Qańtar oqıǵasynan keıin ustalyp, azaptaýdan ólgen adam sany 8 boldy - ombýdsmen
2022 jylǵy 1 shilde 17:00

Qańtar oqıǵasynan keıin ustalyp, azaptaýdan ólgen adam sany 8 boldy - ombýdsmen

NUR-SULTAN. QazAqparat – QR Bas prokýratýrasy usynǵan statıstıkaǵa sáıkes qańtar oqıǵasynan keıin tergeýge alynyp, onyń barysynda azaptalyp ólgen adam sany - 6. Degenmen QR Adam quqyqtary jónindegi ýákili Elvıra Ázimova azaptalyp mert bolǵandar sany odan da kóp ekenin aıtyp otyr, dep habarlaıdy QazAqparat tilshisi.

Buǵan deıin Bas prokýratýra qańtar aıyndaǵy oqıǵalar barysynda 238 adam qaıtys bolǵanyn habarlady. Onyń arasynda 6 adam azaptaý saldarynan mert bolǵan.

QR Adam quqyqtary jónindegi ýákili Elvıra Ázimova ortalyq kommýnıkatsııalar qyzmeti alańynda ótken shara barysynda azaptaýdan 8 adamnyń qaıtys bolǵanyn rastady.

«Bıyl 14 naýryzda Parlamentte qańtar oqıǵasy boıynsha tergeýdiń nátıjesi men barysy týraly birlesken tyńdaý boldy. Lańkestik aktilerge kimder qatysty, qansha adam qaıtys boldy - munyń bári barshamyzdy tolǵandyrady. Biraq tergeýdiń jalǵasyp jatqanyn este ustaǵan jón. Degenmen, bul quqyq qorǵaý organdary men sotty azamattardyń quqyǵyn saqtaý jáne qorǵaý mindetinen bosata almaıdy», - dedi Elvıra Ázimova OKQ alańynda.

«Naýryzda qańtar oqıǵasy kezinde 8 adamnyń azaptan ólgeni aıtyldy. Al taıaýda Bas prokýratýra brıfıng barysynda zańsyz kúsh qoldaný saldarynan qaza tapqan 6 adamnyń bar ekenin rastady. Bul sondaı-aq qoǵam belsendileri men táýelsiz qatysýshylardan alǵan aqparatqa sáıkes keledi», - deıdi ol.

Odan bólek, ombýdsmen qańtardaǵy oqıǵalardan keıin qansha adam azaptaýǵa ushyrady degen saýalǵa jaýap berdi.

«Qazir naqty sany belgisiz. Sebebi ótinish áli de túsip jatyr. Eger qańtardyń ortasynda 10shaqty qylmystyq is qozǵalsa, keıin onyń sany 100-ge jetti. Qazir odan da kóp. Protsess barysynda sandar ózgerip jatyr. Sondyqtan ázirge sońǵy ári naqty san týraly aıtýǵa áli erte», - dep túsindirdi Elvıra Ázimova.


Seriktester jańalyqtary

Jańalyqtar

Úrdis

MURAǴAT