Qańtar oqıǵasy: Zardap shekken kólik ıeleri qaıda habarlasýy kerek
2022 jylǵy 29 qańtar 13:39

Qańtar oqıǵasy: Zardap shekken kólik ıeleri qaıda habarlasýy kerek

ALMATY. QazAqparat – Almatyda jappaı tártipsizdikter kezinde júzden astam kólik zaqymdandy. Birine oq tıse, endi biri órtenip ketti. Ázirge ákimdik zalaldyń ornyn toltyrý tetigin pysyqtap jatyr. Kólik ıeleri ne isteýi kerek? Bul saýalǵa QazAqparat tilshisi jaýap izdep kórdi.

Jappaı tártipsizdikten zardap shekkenderdiń biri Almaty turǵyny agenttik tilshisine basynan ótken oqıǵany aıtyp berdi.

Onyń sózinshe, 6 qańtar kúni keshki saǵat altylar shamasynda ol óz kóligimen úıine kele jatqan. Jol boıy kóligine birneshe ret oq tıgen. Óziniń aman qalǵanyna qudaıǵa shúkirshilik etedi.

«Sol kúni keshke kóshede eshkim bolǵan joq, biraq alań jaqtan atys dybystary estilip jatty. Men Tóle bı boıymen Saın kóshesine bet alǵan bolatynmyn, Tóle bı men Baıtursynov kóshesiniń qıylysyna jetkende órtenip ketken kólikterdi kórdim. Bul kóshede kedergiler kóp boldy, sondyqtan baǵytymdy ózgertýge týra keldi.

Baıtursynov kóshesimen joǵary kóterilip, Qarasaı batyr kóshesine jaqyndaǵanda kóligime oq atyldy. Burshaq jaýǵandaı boldy. Men júrip bara jatqan kólikten sekirip kettim. Asfaltqa quladym. Sodan ornymnan atyp turyp kópqabatty úıge qaraı júgirdim. Kólik 7-8 metr júrip, baǵdarshamǵa soǵyldy. Jaqyn mańdaǵy dámhananyń artyna baryp tyǵyldym. Sol kezde aıaǵymnyń qatty aýyrǵanyn sezdim.

Olar maǵan «toqta» dep aıǵaılady. Olardyń áskerıler ekenin sonda ǵana túsindim. Meni bandıt dep oılapty. Qujattarymdy tekserip, brondy jaýyngerlik mashınamen shyǵaryp saldy. Jedel járdem shaqyryp berdi. Áskerılerge shaǵymym joq. Olar óz jumystaryn istedi. Qarańǵy, ol kúnderi kóshede kimniń kim ekenin anyqtaý qıyn bolatyn. Bir ajaldan aman qalǵan men – óte baqyttymyn», - deıdi ol.

Qazir zardap shekken almatylyq ózin jaqsy sezinedi.

«Men kóliktiń tehnıkalyq jaǵyn túzetip qoıdym. Kólikte oq tesigi kóp. Biraq júrip tur. Bolashaqta kóligimdi satatyn bolsam, qıyndyqtar týyndaýy múmkin. Endi men osy máselemen aınalysqym keledi, «jeke tulǵalarǵa keltirilgen shyǵyndy óteý múmkindigi bar ma?», sony bilgim keledi», - dep surady ol.

Belgili bolǵandaı, tártipsizdikter kezinde zardap shekken kólik ıelerine keltirilgen shyǵyndy óteý máselesimen Almaty qalasynyń Tynys-tirshiligin qalpyna keltirý jónindegi qalalyq shtab aınalysady.

Almatylyq zańger Dınara Turdıevanyń aıtýynsha, búgingi kúni zardap shekkenderge ótemaqy tóleý bastalǵan joq. Óıtkeni ótemaqy tóleý erejeleri áli ázirlenip jatyr.

Óz kezeginde zańger kólik ıelerine birqatar usynys berdi.

«Eń aldymen kólik ıesi kóliktiń shynymen zaqymdalǵanyn anyqtaý úshin polıtsııaǵa aryz berýi kerek. Sonymen qatar, avtokólik saqtandyrylǵan saqtandyrý kompanııasyna tergep-tekserýdiń biryńǵaı tizilimine tirkelgenin rastaıtyn talondy usynýy tıis.

Saqtandyrý tólemin óteýge keletin bolsaq, bul másele jasalǵan saqtandyrý shartynyń túrine qaraı jeke qaralatyn bolady.

Jappaı tártipsizdikter kezinde múlki búlingen tulǵalarǵa keltirilgen zalaldy óteý tetigi áli de ázirleý satysynda», - dep túsindirdi zańger.


Avtor:
Tilshi

Jańalyqtar

MURAǴAT