Qańtar oqıǵasy: Pavlodar oblysynda 327 adam ákimshilik qamaýǵa alyndy
2022 jylǵy 29 qańtar 16:00

Qańtar oqıǵasy: Pavlodar oblysynda 327 adam ákimshilik qamaýǵa alyndy

PAVLODAR. QazAqparat – Qańtar oqıǵalary kezinde Pavlodar oblysynda 1 555 azamat ustaldy. Bul týraly Pavlodar oblystyq Polıtsııa departamentinen málim etti, dep habarlaıdy QazAqparat tilishsi.

«Quqyq qorǵaý organdarynyń kásibı jáne jedel is-sharalarynyń arqasynda barlyq beınejazbalar zerdelenip, soǵan oraı eń belsendi zań buzýshylar tutqynǵa alyndy. Olardyń árqaısysyna qatysty Qazaqstannyń qoldanystaǵy zańnamasyaıasynda is qozǵaldy. Shekteý is-sharalaryna qaramastan buzýshylyqtar da oryn aldy. Atap aıtqanda, polıtsııa 1 554 azamatty ustady», - dep atap ótedi vedomstvodan.

Departament málimetinshe, 870 azamat beıbit mıtıngiler uıymdastyrý jáne ótkizý tártibi týraly zańdy buzǵany úshin jaýapqa tartyldy. Olarǵa qatysty 488-baptyń 6-bóligi boıynsha ákimshilik is qozǵaldy. 4 sheteldik azamatqa qatysty 488-baptyń 8-bóligi boıynsha ákimshilik is qozǵalyp, Qazaqstan Respýblıkasynan tys jerlerge shyǵaryldy. Nátıjesinde, 327 adam 15 táýlikke deıin qamaýǵa alyndy. Barlyq qamaýǵa alynǵan azamat Pavlodar qalasynyń arnaıy mekemelerine qamaldy. 288 tártip buzýshynyń árqaısysyna 30 aılyq eseptik kórsetkish, ıaǵnı 91 890 teńge kóleminde ákimshilik aıyppul salyndy.

«685 azamat pen 349 avtokólik komendanttyq saǵatty buzǵany úshin ustaldy. Olarǵa qatysty Qazaqstan Respýblıkasynyń Ákimshilik kodeksiniń 476-baby boıynsha ákimshilik is qozǵalyp, materıaldar sotqa joldandy. Avtokólikter aıyp turaǵyna qoıyldy.

5 qańtardan bastap Polıtsııa departamentiniń 100 paıyz jeke quramy qyzmet atqarýdyń erekshe rejıminde jumys isteýde. Perımetr boıynsha blokpostar qoıylǵan, oblysqa kirý jáne shyǵý baǵyty shektelgen. Blokpostar arqyly 25 046 avtokólik ótkizildi. Onyń ishinde 44974 adam boldy. 372 kóliktiń jáne 876 azamattyń kirýine jáne shyǵýyna ruqsat berilmedi», - delingen taratylǵan aqparatta.

Sonymen qatar azamattardyń qaýipsizdigin qamtamasyz etý úshin polıtsııa qyzmetkerleri jalǵa beriletin 564 páterdiń 527-sin tekserdi. Nátıjesinde jalǵa alýshylar men jyljymaıtyn múlik ıeleri týraly tolyq aqparat alyndy.


Jańalyqtar

MURAǴAT