Qańtar oqıǵasy: qarý-jaraq dúkeniniń kúzetshisi myltyqtar urlap ketken
2022 jylǵy 8 aqpan 20:02

Qańtar oqıǵasy: qarý-jaraq dúkeniniń kúzetshisi myltyqtar urlap ketken

ALMATY. QazAqparat - Almatyda qańtar oqıǵalary kezinde qarý-jaraq dúkeninen qarý urlaǵan kásiporyn kúzetshisi ustaldy, dep habarlaıdy QazAqparat tilshisi.

Qarý urlaǵan azamat Almaty oblysynyń 42 jastaǵy týmasy, bótenniń múlkin urlaý qylmysy úshin buryn sotty bolǵan. Ol turǵylyqty jeri boıynsha Túrksib aýdanynda ustaldy. Tintý jasaý kezinde modeli ártúrli ıir oıyqty eki karabın (300 mm jáne 5,6 mm kalıbrli), sondaı-aq tegis uńǵyly myltyq (410 kalıbrli) tabyldy.

«Tergeý barysynda ustalǵan azamat osy zattardyń barlyǵyn 5 qańtarda aýdanymyzda ornalasqan qarý-jaraq dúkenine shabýyl jasaý kezinde urlaǵany anyqtaldy. Atalǵan derek boıynsha QR QK-niń 188-baby 3-bóligine sáıkes sotqa deıingi tergeý amaldary bastaldy. Kúdikti ýaqytsha ustaý ızolıatoryna qamaldy. Onyń basqa da qylmystarǵa qatysy bar-joǵy tekserilýde», – dedi Almaly aýdandyq polıtsııa basqarmasynyń basshysy Esen Ysqaqov.

Eske salsaq, 7 aqpannan bastap Almatyda «Qarý» jedel-aldyn alý is-sharasy ótkizilýde. Osyǵan oraı, qarý tabylǵan nemese anyqtalǵan jaǵdaıda azamattar ony óz erkimen quqyq qorǵaý organdaryna tapsyrýy qajet. Bul olardy qylmystyq jaýapkershilikten bosatatyny týraly aıtyldy.


Uqsas jańalyqtar

Jańalyqtar

Úrdis

MURAǴAT