Qańtar oqıǵasy: Іshki ister organdary 3 myńǵa jýyq isti tergep jatyr
2022 jylǵy 2 naýryz 16:41

Qańtar oqıǵasy: Іshki ister organdary 3 myńǵa jýyq isti tergep jatyr

NUR-SULTAN. QazAqparat – Іshki ister organdarynyń tergeýshileri qańtar oqıǵasyna qatysty 2997 qylmystyq isti tergep jatyr. Bul týraly QR Іshki ister mınıstrligi Tergeý departamentiniń bastyǵy Sanjar Ádilov aıtty, dep habarlaıdy QazAqparat.

«Jappaı tártipsizdikterge qatysty qylmystyq ister arnaıy prokýrorlardyń is júrgizýinde, óz kezeginde ishki ister organdary urlyqtardy, tonaýlardy, qarýdy urlaý men tártipsizdik barysynda jasalǵan basqa da qylmystardy tergeýmen aınalysady. Qazir ishki ister organdary tergeýshileriniń óndirisinde 2997 qylmystyq is bar, olar boıynsha sot sanktsııasymen 194 adam qamaýda ustalyp otyr. Olardyń kópshiligi, atap aıtsaq, 152 adam jappaı tártipsizdik barysynda urlyq jasaǵany úshin, 22 adam qarýdy zańsyz saqtaǵany jáne 24 adam qarýdy urlaǵany úshin qamaqqa alyndy», - dedi spıker Ortalyq kommýnıkatsııalar qyzmetinde ótken brıfıngide.

Jeke basyn, densaýlyq jaǵdaıyn jáne tergeýge kórsetilgen kómekti eskere otyryp, 199 kúdiktige qamaýda ustaý sharasy eshqaıda ketpeý týraly qolhatqa, kepilge, úıqamaqqa alýǵa jáne jeke kepilgerlikke aýystyrylǵan.

«Qamaýdaǵy kúdiktilerge tergeý ızolıatorlarynda, sondaı-aq qajet bolǵan jaǵdaıda medıtsınalyq mekemelerde bilikti medıtsınalyq járdem kórsetiledi. Qazirgi ýaqytta ishki ister organdarynyń isteri boıynsha qamalǵandar arasynda densaýlyqqa shaǵymdanǵandar joq. Olarǵa advokattardyń, týystardyń jáne quqyq qorǵaýshylardyń kelýine kedergisiz ruqsat qamtamasyz etilgen. Іshki ister organdary qańtar oqıǵalary boıynsha 174 kúdiktige qatysty qylmystyq isterdi aıyptaý aktisimen aıaqtady», - dedi Sanjar Ádilov.


Uqsas jańalyqtar

Jańalyqtar

Úrdis

MURAǴAT