Qańtar oqıǵasy boıynsha 721 kúdiktiniń 281-i qamaýda otyr – Bas prokýratýra
2022 jylǵy 3 mamyr 15:05

Qańtar oqıǵasy boıynsha 721 kúdiktiniń 281-i qamaýda otyr – Bas prokýratýra

NUR-SULTAN. QazAqparat – QR Bas prokýratýrasy 1 qyzmet bastyǵynyń orynbasary Eldos Qılymjanov qańtar oqıǵasy boınysha kúdikti dep tanylǵan 721 adamnyń 281-i qamaýda otyrǵanyn málim etti, dep habarlaıdy QazAqparat tilshisi.

«Jalpy el boıynsha qańtar oqıǵasy kezinde jappaı tártipsizdik uıymdastyrý jáne oǵan qatysý boıynsha 721 adam kúdikti dep tanyldy. Onyń ishinde 281 adam qamaýda otyr. Almaty qalasynda 82, Shyǵys Qazaqstan oblysynda 35, Jambyl oblysynda 44, Shymkent qalasynda 43, Qyzylorda oblysynda 36, Atyraý oblysynda 14, Almaty oblysynda 5, Aqtóbe oblysynda 4 adam qamalǵan», - dedi ol ortalyq kommýnıkatsııalar qyzmetinde ótken brıfıngide.

Sondaı-aq, ol Shyǵys Qazaqstan oblysynda ekstremıstik top múshesi Semeıdegi tártipsizdikke qatysqanyn aıtty.

«Shyǵys Qazaqstan oblysynyń prokýratýrasy qıratý, múlikti joıý jáne Semeı qalasy ákimdigin basyp alý áreketterine qatysýshyny anyqtady. 5 qańtarda atalǵan qylmysker Semeı qalasy ákimdiginiń ǵımaratynyń aldynda bir top adammen birge «Gazel» markaly polıtsııa avtokóligin aýdaryp tastaǵan. Óziniń áreketimen ol basqa adamdardy baýrap alyp, ákimdikti basyp alýǵa shaqyrǵan. Osy óńirde buryn sotty bolǵan ekstremıstik uıymnyń múshesi, qańtar oqıǵasynyń basqa qatysýshysy anyqtaldy. Ol daýys kúsheıtkish kómegimen Semeı turǵyndaryn qosylýǵa shaqyrǵan jáne qala ákimdigin basyp alýdy uıymdastyrýshylardyń biri bolǵan. Onyń áreketteri vıdeoda jazylǵan jáne tártipsizdikterdiń basqa da qatysýshylardyń jaýaptarymen rastalady», - dedi Eldos Qılymjanov.

Buǵan deıin QR ІІM Tergeý departamentiniń basshysy Sanjar Ádilov qańtar oqıǵasy kezinde ásirese úsh óńirde nysandar qatty tonalǵanyn aıtqan edi.


Seriktester jańalyqtary

Jańalyqtar

Úrdis

MURAǴAT