Qańtar oqıǵalaryna qatysty 101 qylmystyq is sotqa jiberildi, 62 adam sottaldy
2022 jylǵy 2 naýryz 15:09

Qańtar oqıǵalaryna qatysty 101 qylmystyq is sotqa jiberildi, 62 adam sottaldy

NUR-SULTAN. QazAqparat – QR Bas prokýratýranyń Qylmystyq qýdalaý qyzmeti bastyǵynyń orynbasary Eldos Qılymjanov qańtar oqıǵasy kezinde bolǵan qylmystardy tergeý barysyn baıandady, dep habarlaıdy QazAqparat.

«Jedel-tergeý toptarynyń óndirisinde sotqa deıingi 3 666 tergep-tekserý isi bar. Terrorızm aktileri men jappaı tártipsizdikter týraly isterden basqa, tonaý, urlyq, qarýdy urlaý, quqyq qorǵaý organdarynyń qyzmetkerlerine qatysty kúsh qoldaný faktileri tergelýde. Atalǵan sanattan 162 aıyptalýshyǵa qatysty 101 qylmystyq is sotqa joldandy. 62 adam túrli jazalarǵa sottaldy», - dedi E. Qılymjanov Ortalyq kommýnıkatsııalar qyzmetinde.

Onyń aıtýynsha, Almaty qalasy Almaly aýdany sotynyń úkimimen Ońtaı jáne Jeńishan esimdi turǵyndar «Alpamys» ańshylyq dúkeninen qarý urlaǵany úshin kináli dep tanyldy. Sot atalǵan adamdarǵa bes jyl merzimge bas bostandyǵynan aıyrý jazasyn taǵaıyndady.

Qańtar oqıǵalary kezinde 4 myńnan astam adam túrli dárejede jaraqat alǵan. Olardyń ishinde 2402-si – polıtsııa qyzmetkerleri, 990-y – qoǵamdyq tártipti qamtamasyz etýge tartylǵan áskerı qyzmetshiler.

«Quqyq qorǵaý organdary qylmysqa qatysqandardy anyqtaý jáne jaýapqa tartý boıynsha barlyq qajetti sharalardy atqarýda. Aqtóbe qalasynda uıaly telefon beınejazbasynyń arqasynda I. esimdi azamattyń 5 qańtarda VAZ-21014 avtokóligin basqaryp, oblys ákimdigi aldynda polıtseılerdi úlken jyldamdyqpen soqqany anyqtaldy. Nátıjesinde 4 polıtseı dene jaraqattarymen aýrýhanaǵa jatqyzyldy. Polıtsııa qyzmetkerleriniń ómirine qolsuǵýshylyq áreketi úshin bul turǵyn sot sanktsııasymen qamaýǵa alyndy. Sonymen qatar T. jáne I. esimdi turǵyndar dýbınkalardy paıdalanyp, Almaty qalasy ákimdiginiń aldynda polıtsııa qyzmetkerin qatty soqqyǵa jyqqan. Atalǵan adamdar qamaýda otyr», - dedi Eldos Qılymjanov.


Uqsas jańalyqtar

Jańalyqtar

Úrdis

MURAǴAT