Qańtar qyrǵynynan keıin 14 polıtsııa qyzmetkeri em qabyldap jatyr
2022 jylǵy 25 sáýir 17:01

Qańtar qyrǵynynan keıin 14 polıtsııa qyzmetkeri em qabyldap jatyr

NUR-SULTAN. QazAqparat – Qańtardaǵy tártipsizdik kezinde aýyr jaraqat alǵan 14 polıtsııa qyzmetkeri em qabyldap jatyr. Bul týraly QR ІІM Tergeý departamentiniń basshysy Sanjar Ádilov aıtty, dep habarlaıdy QazAqparat tilshisi.

«Buǵan deıin qańtar oqıǵasy kezinde qoǵamdyq tártipti saqtaý boıynsha óz mindetterin oryndaý barysynda tártipsizdikke qatysýshylar tarapynan aıaýsyz soqqyǵa jyǵylǵan, zardap shekken polıtsııa qyzmetkerleri men áskerı qyzmetshiler týraly birneshe ret habarlaǵanbyz. Sol kezde 58 quqyq qorǵaý qyzmetkeriniń súıekteri synyp, atys qarýynan jáne pyshaqtan jaraqat aldy. Shyn máninde, shabýyl jasaǵandar óz is-áreketimen tikeleı olardyń ómirine qaýip tóndirdi. Búgingi tańda aýyr jaraqat alǵan 14 polıtsııa qyzmetkeri emi jalǵastyryp jatyr», - dedi S. Ádilov ortalyq kommýnıkatsııalar qyzmetinde.

Onyń aıtýynsha, Almaty qalasynda jappaı tártipsizdikter barysynda Respýblıka alańynda qoǵamdyq tártipti saqtaýdy júzege asyrǵan Áýezov aýdandyq polıtsııa basqarmasynyń ýchaskelik ınspektory aýyr jaraqat aldy.

Ony ereýilshiler aıaýsyz uryp-soǵyp, onyń moınyna metall armatýramen soqqy jasap, moıyn omyrtqasyn zaqymdaǵan.

Sondaı-aq alǵan jaraqattardyń nátıjesinde eki búıregi de zaqymdandy.

«Atalǵan polıtsııa qyzmetkeri dárigerlerdiń baqylaýynda jáne oǵan bilikti medıtsınalyq kómek kórsetilip jatyr», - dedi Tergeý departamentiniń basshysy.

Budan buryn habarlanǵandaı, qańtar oqıǵasynda 1 502 bıznes nysany tonaldy.

Іshki ister organdary 5 041 qylmystyq is boıynsha tergeý júrgizip jatyr.


Seriktester jańalyqtary

Jańalyqtar

Úrdis

MURAǴAT