Qańtar qasiretine qatysty aq pen qarany ajyrata bilýimiz kerek – Qazybek Maıgeldınov
2022 jylǵy 25 aqpan 19:26

Qańtar qasiretine qatysty aq pen qarany ajyrata bilýimiz kerek – Qazybek Maıgeldınov

NUR-SULTAN. QazAqparat – Qańtar qasiretine qatysty aq pen qarany ajyrata bilýimiz kerek. Bul týraly QazAqparatqa suhbat bergen «Rýhanı jańǵyrý» qazaqstandyq qoǵamdyq damý ınstıtýtynyń basqarma tóraǵasy Qazybek Maıgeldınov aıtty, dep habarlaıdy QazAqparat tilshisi.

«Menińshe, qazirgi tańda eń bastysy aq pen qarany ajyrata bilýimiz kerek. Aq pen qara degenimiz degen ne? Qaraly qańtar kúnderindegi oqıǵalardy qarap otyrsaq, árıne bastapqyda bári beıbit sherý bolyp bastaldy. Oǵan eshkim kúmán keltirmeıdi. Biraq, 10 qańtarda Almatydan taraǵan sýretter, vıdeolardan kórgenimizdeı qanshama úılerdiń, ǵımarattardyń, jedel járdem kólikteriniń órtenip, astan-kesteń bolǵany, sońǵy málimetterge sáıkes 200-den astam beıbit azamattyń ólimi naqty qylmys jasalǵanyn kórsetedi. Al qylmysker kim? Ol jerde uıymdasqan qylmystyq toptardyń, ekstremıstik toptardyń ókilderi boldy. Ony da moıyndaımyz. Lańkester de boldy», - dedi ol.

Sarapshynyń atap ótýinshe, eń bastysy qylmyskerler izin jasyryp úlgermeýi, basqa jaqqa qashyp ketpeýi úshin qaqtyǵystar oryn alǵan jerde bolǵan kýágerlerdi tergeý kerek.

«Eń aldymen dálel kerek. Qazirgi ýaqytta Bas prokýratýra, Іshki ister mınıstrligi apta saıyn brıfıng ótkizedi. Brıfıng ótkizýdegi maqsat ne? Brıfıng maqsaty - 5 myń adam ustalǵanyn, 4 myńy kinásiz ekendigi dáleldengen soń jiberilgenin» jetkizý. Biraq, kinálilerdi anyqtaý úshin tergeý jumystary tereńdeı túsýi kerek», - dedi Qazybek Maıgeldınov.

Osy rette ol naýryz aıynda Memleket basshysy Joldaýynan ne kútetindigin de atap ótti.

«Prezıdent naýryzdyń ortasynda bolatyn Joldaýynda naqty mynandaı toptar, mynadaı adamdar dep bet-perdesin ashsa, bul halyqqa alǵashqy jaýap bolady. Biraq, tergeý jumysynda asyǵýǵa bolmaıdy. Óıtkeni, biz ádilettilikti kóp izdep, kinási joq adamdarǵa qatysty ádiletsizdikke barýymyz múmkin. Osy máselege tereń mán berý kerek. Prezıdent te aıtyp júr. Kez kelgen adamdy kinálamas buryn aldymen oǵan taǵylǵan aıyp tolyǵymen dáleldenýi kerek. Tolyq dáleldengende ǵana ol qylmysker bolady. Al oǵan deıin ol tek aıyptalýshy», - dedi ol.


Seriktester jańalyqtary

Jańalyqtar

Úrdis

MURAǴAT