Qandasymyz Baıan Jalynqyzy Beıjiń Olımpıadasynda baq synaıdy – Sheteldegi qazaq baspasózi
2021 jylǵy 19 jeltoqsan 11:53

Qandasymyz Baıan Jalynqyzy Beıjiń Olımpıadasynda baq synaıdy – Sheteldegi qazaq baspasózi

NUR-SULTAN. QazAqparat - «QazAqparat» HAA shet memleketterde qazaq tilinde taraıtyn aqparat kózderine aptalyq sholýyn usynady.

Qandasymyz Baıan Jalynqyzy Beıjiń qysqy Olımpıadasynda baq synaıdy – Shyńjan gazeti

Shańǵy sporty túrleri boıynsha Qytaı ulttyq quramasyna qabyldanǵan Baıan Jalynqyzy Beıjiń qysqy Olımpıadasynda baq synaıdy, dep jazady Shyńjan gazeti.

Atalǵan BAQ-tyń derginshe, qandasymyz Baıan 1999 jyly Qytaıdyń Altaı aımaǵynda týǵan. Ol Beıjiń qalasynda ótetin 2022 jylǵy XXIV qysqy Olımpıada oıyndarynda Taý shańǵysy sportynan óner kórsetedi. Baıan 2018 jyldan bastap Norvegııa elinde 3 jyl boıy Taý shańǵysy sporty boıynsha daıyndalyp, biliktiligin shyńdaǵan.

«2018 jyly Norvegııa eline alǵash barǵan kezde, jergilikti sportshylarmen aradaǵy jarystarda olardyń shalymyna da kelmedik. Tipten bapkerlerimizdiń jattyǵýlaryna da ilese almaı júrdim. Keıin ýaqyt óte kele osy qyıyndyqtardy birtindep eńserdim. Jańa ortaǵa da úırendim. Sporttyq nátıjemiz de, biliktiligimiz de joǵarlady. Osydan soń kóńilimizge senim uıalady. Men sporttyq sheberligimdi úzdiksiz jetildirýge bar kúsh-jigerimdi jumsap talaptandym. Endigi arman, asar asýymyz Beıjiń qysqy Olımpıadasynda jeńis jolynan, bıik tuǵyrdan kóriný. Sol úshin bar kúshimizdi salyp, baq synaımyz», - deıdi Baıan Jalynqyzy.

Qashqarlyq keıýana 135 jasynda ómirden ozdy - Qytaıdyń «Ortalyq halyq radıosy» (CNR)

Qytaıdyń Qashqar aımaǵynda turatyn keıýana Alymqan Seıit 16-shy jeltoqsan kúni Qashqar qalasynda qaıtys boldy, dep jazady kazakcnr.com saıty.

Atalǵan aqparat kóziniń jazýynsha, Alymqan Seıit - Qytaıdyń Qashqar aımaǵy Jańashar aýdany Qumshilik aýylynda turǵan. Úsh ǵasyrdyń kýási bolǵan keıýana 1886 jyly 25-shi maýsymda týǵan. Bul kezeń Qytaıdy manchjýrlar áýleti bılegen Chın patshalyǵynyń zamanyna týra keledi. Al Alymqan Seıitti 2013 jyly Qytaıdyń qarttar uıymy (Gerontologııa) eń uzaq jasaǵan adam dep tanyǵan.

Alymqan Seıit 1903 jyly 17 jasynda Turdy Rozyǵa turmysqa shyqqan. Biraq bala súıe almaǵan erli-zaıyptylar bir ul, bir qyz asyrap alady. Uly 36 jasynda aýyryp qaıtys bolyp, kóp uzamaı kúıeýi Turdy da máńgilik saparǵa attanady. Búgingi kúni Alymqannyń sol jalǵyz qyzy Tájigúlden taraǵan 40-qa jýyq urpaǵy bar eken. Al keıýanany Qashqar qalasynda turatyn nemeresi Qurban Nur kútim jasap, baqqan. Osylaısha úsh ǵasyrdyń kýási sanalǵan Alymqan Seıit 16-nshy jeltoqsan kúni, 135 jasynda osy nemeresiniń úıinde ómirden ozǵan.

Al keıýananyń júrip-turýy qıyndaǵan sońǵy jyldarǵa deıingi kúndelikti tirshilik daǵdysy qarapaıym bolǵan.Tańǵy saǵat 5-6-da turyp namazyn oqyp, 8-de tańǵy asyn ishken. Keshki saǵat 10-da uıyqtap demalǵan. Shaı ishkendi unatpaıdy, onyń ornyna salqyn sý ishken. Nan, qoıan etin jep, kespe, qyryqqabat sorpasyn ishýdi jaqsy kórgen. kóńil-kúıi jaıdary, án aıtýǵa áýes bolǵan. Tirshiliginde eginshilikti kásip etken keıýana qaýyn, shabdaly jáne qara órik sııaqty jemisterdi jegendi unatqan. Sonymen birge eń súıikti jemisi - kishkentaı, qyshqyl jasyl órik bolǵan.

Eske sala keteıik, ótken jyly QazAqparat A.Seıittiń 134 jasqa tolǵan týǵan kúnin atap ótkeni týraly aqparat jazǵan bolatynbyz.

Táýelsizdik kúnine oraı Mońǵolııadan mýzykalyq quttyqtaý joldady - KAZNEWS

Qazaqstan Respýblıkasy Táýelsizdiginiń 30 jyldyǵyn merekeleý aıasynda Qazaqstan Respýblıkasynyń Mońǵolııadaǵy Elshiligi men Mońǵolııany mekendeıtin qandastar birlesip birqatar is-sharalar uıymdastyrdy, dep habarlaıdy Mońǵolııanyń Kaznews aqparat portaly.

«14 jeltoqsan kúni «Ider» ýnıversıtetinde Qazaq tili, ádebıeti jáne mádenıeti kabıneti ashyldy. Jobany Qazaqstannyń Mońǵolııadaǵy Elshiligi, «Otandastar» qory, «Baıan-Ólgıı aımaǵynyń Ulan-Batyrdaǵy Jerlester alqasy» úkimettik emes uıymy jáne «Ider» ýnıversıteti birlesip júzege asyrdy. Al, 15 jeltoqsan kúni Qazaqstannyń Mońǵolııadaǵy Elshiligi «El birligi» úkimettik emes uıymymen birlesip Nalaıh qalasyndaǵy Qazaq mádenı ortalyǵynda Táýelsizdik kúnine arnalǵan mýzykalyq quttyqtaýdy uıymdastyrdy. Mońǵoldyń ulttyq kıimin kıgen dombyrashylar toby qazaqtyń belgili kompozıtorlarynyń shyǵarmalaryn oryndady.

Elshi J.Ádilbaev Nalaıh qalasyndaǵy qazaq dıasporasynyń jastaryna erekshe quttyqtaý úshin alǵysyn aıta otyryp, dombyranyń jaı ǵana mýzykalyq aspap emes, onyń qasıetti mura ekenin jáne qazaq halqynyń ózindik kelbeti bar brendi ekenin atap ótti.

Sonymen qatar, 15 jeltoqsanda Elshiliktiń qoldaýymen Mońǵolııanyń Qazaqstan Respýblıkasyndaǵy burynǵy Elshisi Damdınjav Dashnıamnyń «Eýrazııanyń injý-marjany» atty maqalasy mońǵol tilinde «Ódrıın sonın» gazetinde jarııalandy. Maqalada avtor Qazaqstan týraly alǵan áserlerimen bólisedi, táýelsizdiktiń 30 jyly ishinde júrgizilgen reformalar men halyqaralyq sahynada qol jetkizgen tabystar týraly oılarymen bólisedi», - dep jazdy Kaznews.

Ózbek Baqshy óneri ıÝNESKO tizimine endi - «ÓzA» aqparattyq agenttigi

Erekshe tarıhı-mádenı mura Baqshylyq óneri (jyraýlyq óner) ıÝNESKO tizimine endi, dep jazady Ózbekstannyń «ÓzA» memlekettik aqparattyq agenttigi.

«ıÝNESKO-nyń Materıaldyq emes mádenı murany qorǵaý jónindegi úkimetaralyq komıtetiniń XVI sessııasy aıasynda Baqshylyq óneri Ózbekstannyń materıaldyq emes mádenı murasynyń elementi retinde adamzattyń materıaldyq emes mádenı murasynyń reprezentatıvti tizimine engizildi. Týrızm jáne sport mınıstrliginiń málimetinshe, osy element boıynsha nomınatsııalar paketin repýblıkanyń ıÝNESKO isteri jónindegi Ulttyq komıssııasy daıyndap, 2020 jyly usynǵan. Mınıstrliktiń habarlaýynsha, bul sheshim ıÝNESKO-nyń qoldaýymen ulttyq jáne halyqaralyq deńgeıde Baqshy ónerin saqtaý, jańǵyrtý jáne nasıhattaý sharalaryn odan ári kúsheıtýge qyzmet etedi», - dep jazady «ÓzA» aqparattyq agenttigi.

Ankarada Alash arystaryn eske aldy – TRT

Qazaqstan Táýelsizdiginiń 30 jyldyǵyna oraı Ankaradaǵy Túrik tarıhy murajaıy men saıabaǵynda «Táýelsizdik jolynda Alash qozǵalysy» atty konferentsııa ótti, dep habarlaıdy Túrkııa Radıo Televızııa portaly.

«Etımesgýt mýnıtsıpalıtetiniń qoldaýymen «Kók Tý» qazaq mádenıet qoǵamy uıymdastyrǵan ǵylymı konferentsııa sheıitterdi bir mınýt únsizdikpen eske alýmen, artynan eki eldiń memlekettik ánurandarynyń oryndalýymen bastaldy. Betashar sózderden keıin ǵalymdar Alash qozǵalysynyń ıdeologııasyn hronologııalyq jáne taqyryptyq turǵydan talqylady. Konferentsııada Professor Gúljanat Qurmanǵalıeva «Alash ıdeıalary men qyzmeti», Professor Nergıs Biraı «Qazaq gazeti (1913-1918) jáne Alash ıdeıasy», Eldos Toqtarbaı «Alash avtonomııasy jáne taratylǵannan keıingi qyzmeti», Professor Abdýaqap Qara «Alash jáne Mustafa Shoqaı» atty baıandamalaryn oqyldy» , - dep jazady TRT.

Tegeranda Qazaqstan Táýelsizdiginiń 30 jyldyǵy merekelendi – Fars

Tegerannyń «Parsıan Azadı» qonaqúıinde Qazaqstannyń Irandaǵy Elshiliginiń uıymdastyrýymen Qazaqstan Táýelsizdiginiń 30 jyldyq mereıtoıyna arnalǵan saltanatty qabyldaý ótti, dep habarlaıdy Irannyń Parstoday aqparat agenttigi.

«Atalǵan is-sharaǵa Irannyń birqatar memlekettik organdarynyń basshylary,Tegeranda tirkelgen sheteldik dıplomatııalyq ókildikter men halyqaralyq uıymdardyń basshylary, ırandyq kórnekti qoǵam qaıratkerleri, ǵylymı, shyǵarmashylyq zııaly qaýym jáne qazaq dıasporasynyń ókilderi – jalpy, 150-den asa adam qatysty.

Saltanatty qabyldaýda Irandaǵy QR Elshisi A.Orazbaı sóz sóılep, Qazaqstan óz táýelsizdiginiń 30 jyly ishinde ekonomıkalyq reformalardy sátti júzege asyrdy, nátıjesinde keńestik úlgidegi josparly ekonomıka álemdik saýda-ekonomıkalyq júıege tolyqtaı ıntegratsııalanǵan erkin naryqtyq ekonomıkaǵa kóshti dep atap ótti.

Sonymen qatar, Elshi táýelsizdik jyldary Qazaqstanǵa kelgen tikeleı sheteldik ınvestıtsııa 380 mlrd. dollarǵa jetkenin, bul Ortalyq Azııaǵa tartylǵan sheteldik ınvestıtsııalardyń jalpy kóleminiń 75%-ynan astamyn quraıtynyn málimdedi.

Elshi A.Orazbaı sóziniń jalǵasynda Qazaqstannyń mańyzdy jetistikteriniń qatarynda ultaralyq jáne konfessııaaralyq kelisimniń biregeı modeli qalyptasqanyn, kórshi memlekettermen, sonyń ishinde Reseımen jáne Qytaımen shekara tolyqtaı delımıtatsııalanǵanyn, sondaı-aq Kaspıı teńiziniń quqyqtyq mártebesi týraly konventsııaǵa qol qoıý nátıjesinde teńiz shekaralarynyń delımıtatsııalanǵanyn atady.

A.Orazbaı Qazaqstan-Iran qarym-qatynasynyń damýy týraly bólek aıta kele, Qazaqstan táýelsizdik alǵan kúnnen bastap ekijaqty qarym-qatynastar árqashan ekijaqty deńgeıde de, kópjaqty formatta da ózara qoldaýǵa negizdelgen saıası dıalogtyń joǵary serpinimen sıpattalyp kele jatqanyn atap ótti.

Eki memlekettiń arasyndaǵy taýar aınalymy 2021 jyldyń 9 aıynda 2020 jyldyń osy kezeńimen salystyrǵanda 2,2 esege óskeni atap kórsetildi.

IIR Úkimetiniń atynan qabyldaý rásiminiń bas qonaǵy bolǵan IIR Aýyl sharýashylyǵy djıhady mınıstriniń orynbasary M.Ǵorbanı sóz alyp, Qazaqstan 30 jyl ishinde saıası, ekonomıkalyq, ákimshilik-basqarý, ǵylymı, tehnologııa salalarynda aıtýly jetistikterge qol jetkizgenin joǵary baǵalady.

Іs-shara baǵdarlamasynyń erekshe bóligi retinde Tegeran óner ýnıversıtetiniń skrıpkashylary qazaqtyń halyq mýzykasy men tanymal qazaqstandyq kompozıtorlardyń áýenderin oryndady.

Sondaı-aq, is-shara barysynda qonaqtar nazaryna Qazaqstannyń jetistikteri, Qazaqstan-Iran qarym-qatynasynyń damýy týraly arnaıy fılm, fotokórme usynylyp, qazaqtyń ulttyq taǵamdary qoıylǵan merekelik dastarhan jaıyldy», - dep jazady Parstoday aqparat agenttigi.


Avtor:
Tilshi

Jańalyqtar

MURAǴAT