Qaǵazda barlyǵy minsiz, al ómirde múlde basqa kórinis — Nurtóre Júsip jastar bilimi týrasynda
2022 jylǵy 20 mamyr 11:50

Qaǵazda barlyǵy minsiz, al ómirde múlde basqa kórinis — Nurtóre Júsip jastar bilimi týrasynda

NUR-SULTAN. QazAqparat - Qaǵazda barlyǵy minsiz, al ómirde múlde basqa kórinis. Bul týraly Senattaǵy jastardy qoldaý taqyrybyna arnalǵan parlamenttik tyńdaýda depýtat Nurtóre Júsip aıtty, dep habarlaıdy QazAqparat tilshisi.

Senator qazirgi tańda óskeleń urpaqty tárbıeleý men qoldaý máseleleriniń ótkir turǵanyna nazar aýdardy. Rasynda, Jańa Qazaqstandy qurý úshin óskeleń urpaq áleýmettik jaǵynan qorǵalýy kerek. Al bul jerde, senatordyń aıtýynsha, Úkimetke, ásirese, jastardy oqytý men jumysqa ornalastyrýǵa qatysty suraqtar jetkilikti.

«Reformalardyń nátıjesi salynatyn qarjy men adam resýrsyna táýeldi, sondyqtan kadrlardyń kásibı deńgeıi men biliktiligine kóp nárse baılanysty. Al endi eldegi JOO men kolledjderdi bitirgen, bir emes, qoldarynda birneshe dıplomy bar jastar eńbek naryǵynyń suranysyn qanaǵattandyra almaı otyr. Jumys berýshilerdiń suranysy bir bólek, bilim berý júıesiniń oqý baǵdarlamasy bir bólek. Sonyń saldarynan jumyssyz júrgen jas azamattardyń qatary tolyǵa túsýde. 2021 jylǵy jeltoqsan aıyndaǵy jaǵdaı boıynsha oqý bitirgen 168 000-nan astam adamnyń, 110 myńy ǵana jumysqa ornalasqan. JOO túlekteriniń 31 paıyzy, kolledj túlekteriniń 33 paıyzy jumys tappaı sandalyp júr», - dedi depýtat.

Nurtóre Júsiptiń sózine qaraǵanda, jumyssyzdyqpen kúresý baǵdarlamalary tıisti nátıje bermeı otyr, óıtkeni qarjynyń basym bóligi ýaqytsha jumys oryndaryn qurýǵa jumsalady. Al, bul tásil máseleni sheshpeıdi.

«Sońǵy 5 jylda bir ǵana «Eńbek» baǵdarlamasyna 695 mıllıard teńge bólingen. Nátıje qaıda? Munyń suraýy kimde? — dep surady senator.

Budan buryn habarlanǵandaı, Senat tóraǵasy M. Áshimbaev barlyq reformanyń túpki maqsaty da jastardyń ál-aýqatyn arttyrýǵa ári olardyń damýyna jaǵdaı jasaýǵa arnalǵanyn atap ótti .

Sonymen qatar ol ýnıversıtet bitirgen túlekterge eńbek naryǵynda suranys joq ekenin aıtty.



Avtor:
Tilshi

Jańalyqtar

MURAǴAT