Izraıl Gazadaǵy HAMAS kóshbasshysynyń úıin talqandady
2021 jylǵy 16 mamyr 20:19

Izraıl Gazadaǵy HAMAS kóshbasshysynyń úıin talqandady

GAZA. QazAqparat – Jeksenbi kúni túnde jáne tańerteń HAMAS jaýyngerleri Izraılge zymyran shabýylyn jalǵastyrdy, al Izraıl áskerıleri Gaza sektoryna jańa soqqylar jasady. 2014 jyldan bergi eń úlken qaqtyǵys jetinshi kúnge sozyldy jáne deeslakatsııa belgileri kóriner emes, dep habarlaıdy QazAqparat BBC-ge silteme jasap.

Izraıl áskerıleriniń habarlaýynsha, soqqylardyń biri HAMAS tobynyń saıası kóshbasshysy ıAhıa Sınvardyń úıine tıgen. Bul ýaqytta úıde bireýdiń bolǵan-bolmaǵany áli belgisiz.

Tańerteń Izraıl qorǵanys armııasy úıdegi jarylystyń sýretterin jarııalady.

Taǵy bir áýe soqqysy HAMAS qozǵalysynyń «Djabalııa» batalony komandıriniń úıine túsken.

Izraıl áskerıleri eki úıde de toptyń terrorıstik ınfraqurylymy bolǵanyn habarlady.


HAMAS ókilderiniń málimdeýinshe, jeksenbi kúni tańerteń Gazada 26 adam qaza tapqan. Osylaısha, qaıtys bolǵandardyń jalpy sany 174-ke jetti, onyń ishinde 47 bala bar.

Izraılde on adam mert bolǵan, onyń ishinde eki bala bar.

HAMAS jaýyngerleri Izraıl aýmaǵyn zymyranmen atýdy jalǵastyrdy, saldarynan kóptegen turǵyndar bombadan qashýǵa májbúr boldy. Izraıl áskerıleriniń málimetinshe, bir túnde palestınalyqtar Izraılge qaraı 120-ǵa jýyq zymyran atqan.

Jalpy alǵanda, eskalatsııa basynan beri Izraıl armııasynyń málimetinshe, Palestına toptary Izraıl aýmaǵynda 2900-ge jýyq zymyrandy atqan, onyń 1150-in «Temir kúmbez» júıesi ustap aldy. Al 450 zymyran Gazanyń ózine qulaǵan, dep habarlaıdy Izraıl qorǵanys armııasy.

Jeksenbi kúni keshke osy qaqtyǵysqa arnalǵan BUU Qaýipsizdik Keńesiniń otyrysy belgilendi.

Bir kún buryn AQSh prezıdenti Djo Baıden Izraıl premer-mınıstri Bınıamın Netanıahýmen jáne Batys jaǵalaýdaǵy Palestına ákimshiliginiń basshysy Mahmýd Abbaspen telefon arqyly sóılesip, jaǵdaıǵa alańdaýshylyq bildirdi.

Seısenbi kúni eýrodıplomatııa basshysy Jozep Borrel HAMAS pen Izraıl arasyndaǵy qaqtyǵystyń ýshyǵýyn Eýroodaqtyń Syrtqy ister basshylarymen talqylaıdy.

Uqsas jańalyqtar
Seriktester jańalyqtary

Jańalyqtar

Úrdis

MURAǴAT