Jańalyqtar  >
  Sport
Islamıadada qazaqstandyqtar medaldar sany jóninen tórtinshi orynda tur
2022 jylǵy 13 tamyz 10:23

Islamıadada qazaqstandyqtar medaldar sany jóninen tórtinshi orynda tur

NUR-SULTAN. QazAqparat - Túrkııanyń Konıa qalasynda ótip jatqan Islam yntymaqtastyǵy oıyndarynda jalpy komandalyq esepte qazaqstandyq sportshylar tórtinshi orynda keledi, dep habarlaıdy QazAqparat tilshisi.

Qazaqstandyq sportshylar qazirge deıin 36 medal enshilep úlgerdi. Olardyń 12-i altyn, 5-i kúmis, 19-y qola.

Ótken táýlikte aýyr atlet Zýlfııa Chınshanlo (59 keli), áıelder kúresinen Elena Shalygına (65 keli) chempıon tuǵyryna kóterildi.

Al taekvandodan 87 kelide Baýyrjan Hasenov, grek-rım kúresinen 55 kelide Amanǵalı Bekbolatov qola júldege qol jetkizdi.

Sondaı-aq, sporttyq gımnastıkadan el quramasy atalǵan dodada 3 kúmis, 1 qola aldy.

Jalpy komandalyq esepte Túrkııa 114 (41 altyn, 41 kúmis, 32 qola), Iran 54 (22 altyn, 18 kúmis, 16 qola), Ózbekstan 53 (18 altyn, 14 kúmis, 21 qola) medalmen alǵashqy úshtikte keledi.

Islam yntymaqtastyǵy oıyndary 2005 jyldan beri turaqty ótkizilip keledi. Bıyl besinshi márte jalaýyn jelbiretti.

Bıylǵy dodada 55 elden sportshylar keldi. Oıyndar 8 tamyzda bastaldy. Ol 18 tamyzda máresine jetedi.



Foto: olympic.kz





Uqsas jańalyqtar
Seriktester jańalyqtary

Jańalyqtar

Úrdis

MURAǴAT