Іshki ister organdary men Ulttyq ulan tarıhyna arnalǵan kórme ashyldy
2022 jylǵy 21 maýsym 14:22

Іshki ister organdary men Ulttyq ulan tarıhyna arnalǵan kórme ashyldy

NUR-SULTAN. QazAqparat – Nur-Sultan qalasynda Іshki ister organdary men Ulttyq ulannyń qurylý tarıhynan syr shertetin kórme jumysyn bastady, dep habarlaıdy QazAqparat tilshisi.

1992 jyly 23 maýsymda Qazaqstan Respýblıkasynyń Joǵarǵy Keńesi ishki ister organdary týraly zań qabyldady.

Osyǵan oraı jyl saıyn 23 maýsym elimizde ishki ister organdary qyzmetkerleriniń kásibı merekesi retinde atalyp ótiledi.

«Búgingi kórme elimizdiń ishki ister organdarynyń qurylý, qalyptasý jáne búginge deıingi tarıhynan habardar etedi. Іshki ister organy salasynda 1956 jyldan bastap eńbek etip kelemin. Sondyqtan men bul salanyń ystyǵyn da, sýyǵyn da kórgenmin desem bolady. Ol kezdegi jáne qazirgi jaǵdaı múldem basqasha. Jalpy qoǵamda tártip ornatýda polıtseılerdiń eńbegi zor. Olardyń jumysyna tabys tileımin», - dedi Іshki ister organdary jáne ulttyq ulan ardagerler keńesiniń tóraǵasy, mılıtsııa general-maıory Ómirzaq Bolsambekov kórmeniń ashylý saltanatynda.

QR Qarýly kúshteriniń áskerı-tarıhı murajaıynda ashylǵan kórmege ishki ister organdary men ulttyq ulan qurylýynan habar beretin qujattar. Sala qyzmetkerleriniń nagradalary men qyzmettik formalary qoıylǵan.

«Ulttyq ulannyń basty mindeti – qoǵamda tártipti qamtamasyz etý. Kúndelikti tártip saqshysy bolýdan bólek, aıtýly OBSE (Eýropadaǵy qaýipsizdik jáne yntymaqtastyq uıymy), Azıada jáne basqa da elimizde ótken halyqaralyq mańyzdy shara kezinde ulandyqtar tártipti baqylady. Sondaı-aq, elimizge shet memleket basshylary kelgen kezde de ulandyqtarǵa artylatyn jaýapkershilik joǵary. Odan bólek, bizdiń qyzmetkerler strategııalyq mańyzy bar nysandardy kúzetedi. Búgingi kórme arqyly ishki ister organdary men ulttyq ulan qyzmeti týraly ekspozıtsııalar arqyly tanysa alasyzdar. Kórmege qoıylǵan ár dúnıeniń óz tarıhy bar», - deıdi Ulttyq Ulan Bas qolbasshysynyń orynbasary Albert Matkarımov.

Onyń aıtýynsha, elimiz Táýelsizdik alǵaly 4 myńnan astam ishki ister organdary qyzmetkerleri erligi úshin memlekettik nagradalarmen marapattaldy.


Uqsas jańalyqtar
Seriktester jańalyqtary

Jańalyqtar

Úrdis

MURAǴAT