Jańalyqtar  >
  Sport
IRONMAN ASTANA: Qazaqstandyq sportshy úzdik úshtikke ilindi
2022 jylǵy 14 tamyz 17:45

IRONMAN ASTANA: Qazaqstandyq sportshy úzdik úshtikke ilindi

NUR-SULTAN. QazAqparat - Elordada ótip jatqan trıatlonǵa álemniń 56 elinen 1700-den astam atlet qatysyp jatyr, dep habarlaıdy QazAqparat.

Mádenıet jáne sport mınıstri Dáýren Abaev jarystyń mundaı aýqymy trıatlonnyń elimizde tanymaldyǵynyń aıǵaǵy ekenin aıtty.

«Jasalǵan jaǵdaılar, barynsha qolaıly aýa raıy men minsiz trassa jarysty sátti ótkizýdiń kepiline aınalaryna, al qazaqstandyq qonaqjaılylyq atmosferasy kóptegen qatysýshylardy elimizge qaıta oralýǵa yqpal eterine senimdimin. Qazaqstandyq Dına Shaımerdenovanyń IRONMAN 70.3 ASTANA fınalısteriniń qataryna kirgeni qýantady, onyń nátıjesi - 4 saǵat 36 mınýt», - dedi QR Mádenıet jáne sport mınıstri Dáýren Abaev.

Qazaqstandyq qatysýshylar arasynda tanymal Olımpıada chempıony Serik Sápıev, kásibı trıatlonshy Ekaterına Shatnaıa, «Orda» tobynyń solısi Dastan Orazbekov jáne «Almaty Marafon» atqarýshy dırektory Saltanat Qazybaeva jáne basqalary bar.

Osylaısha, Lıýksembýrgten kelgen Godard Olivier erler arasynda Temir qashyqtyqtyń «jartysyn» eńserip (3 saǵat 59 mınýt) birinshi keldi, ekinshi bolyp reseılik Bogdan Kovalenko (4 saǵat), úshinshi bolyp Alekseı Nıkýlın (4 saǵat 10 mınýt) márege jetti.

Áıelder arasynda márege birinshi bolyp túrkııalyq sportshy qyz – Sayar Sera (4 saǵat 35 mın), ekinshi – reseılik Inna Tsyganok-Týtýkına (4 saǵat 36 mın), úshinshi – Dına Shaımerdenova jetken.

Birneshe saǵattan keıin ár jas tobynyń jeńimpazdary anyqtalady. Shara sońynda olardyń qaısysy kelesi jyly Fınlıandııanyń Lahtı qalasyna - IRONMAN 70.3 chempıonatyna baratyny belgili bolady.

Qazirgi ýaqytta tolyq qashyqtyqqa qatysýshylar arasynda jarys jalǵasýda.


Uqsas jańalyqtar
Seriktester jańalyqtary

Jańalyqtar

Úrdis

MURAǴAT