Irandaǵy Ázerbaıjan elshiligine jasalǵan shabýyl lańkestik áreket emes– Iran SІM basshysy
ASTANA. QazAqparat – Irannyń arnaıy qyzmeti men qaýipsizdik qyzmeti juma kúni Irandaǵy Ázerbaıjan elshiliginde bolǵan atys «terrorlyq áreket nemese uıymdasqan qylmys emes», jeke adam tarapynan jasalǵan qastandyq, degen qorytyndyǵa keldi, dep málimdedi Irannyń Syrtqy ister mınıstri Hoseın Amır Abdollahııan, dep habarlaıdy QazAqparat Sınhýa agenttigine silteme jasap.
Abdollahııan Irandaǵy Ázerbaıjan elshisimen birlesip baspasóz jıynyn ótkizip, Iran prezıdenti Ebrahım Raısı oqıǵany tergep, kinálilerdi jaýapqa tartýdy buıyrǵanyn atap ótti.
Sol kúni Iran SІM basshysy Ázerbaıjannyń Syrtqy ister mınıstri Djeıhýn Baıramovpen telefon arqyly tildesip, bul oqıǵa eki eldiń qarym-qatynasyna syzat túsirmeýi keregin atap ótti. Sondaı-aq ol eki eldiń qaýipsizdik qyzmetine oqıǵany birlese tergeýdi usyndy.
Irandaǵy Ázerbaıjan elshiliginde 27 qańtar tańerteń atys bolyp, dıplomatııa ókildiginiń kúzet basshysy qaza tapty, al onyń eki áriptesi jaraqat aldy. Iran polıtsııasy, shabýyl jasaǵan adamnyń sózin negizge ala otyryp, shabýyl jeke adamǵa qatysty jasalǵan qastandyq, dep málimdedi. Ázerbaıjannyń Syrtqy ister mınıstri elshilik qyzmetkerleri men olardyń otbasy múshelerin evakýatsııalaý úshin qajet sharalardy jasaýdy josparlap otyrǵanyn jetkizdi. Ázerbaıjan Prezıdenti Ilham Alıev áleýmettik jelide atysty «terakt» dep oılaıtynyn jáne tez arada kinálilerdi jazalaýdy talap etetinin jazdy.
Aıta keteıik, keshe Qazaqstannyń Syrtqy ister mınıstrligi Irandaǵy Ázerbaıjan elshiligine jasalǵan shabýyldy qatań aıyptady.
Foto: REUTERS
Jańalyqtar
