Indonezııada jer silkinisi qurbandarynyń sany artty

DJAKARTA. QazAqparat – Osy aptada Indonezııany dúr silkindirgen jer silkinisi qurbandarynyń sany 56 adamǵa deıin artty, dep habarlaıdy «QazAqparat» HAA Reuters agenttigine silteme jasap.

Juma kúni Dúleı apattardyń saldaryn azaıtý agenttigi (BNPB) Indonezııanyń Batys Sýlavesı provıntsııasynda bolǵan eki jer silkinisinen 42 adam qaza tapqanyn habarlaǵan bolatyn. Birinshi jerasty dúmpýi – 6,2 ball, ekinshisi 5,9 ball qýatymen boldy.

BNPB málimetteri boıynsha, 6,2 baldyq alǵashqy jer silkinisinen keıin 820-dan astam adam jaraqat alyp, 15 myńǵa jýyǵy úılerin tastap shyǵýǵa májbúr boldy. Kýágerlerdiń aıtýynsha, keıbireýler taýlardan pana izdegen, al basqalary evakýatsııalyq ortalyqtarǵa barǵan.

Zilzala epıtsentri Sýlavesı aralynyń batysyndaǵy Mamýdjý qalasynyń mańynda ornalasqan. Jerasty dúmpýleri adamdar uıqyǵa ketken ýaqytta, túnde bolǵan. Bul faktor zardap shekkenderdiń kóp bolýyn túsindiredi.