Import taýarlarǵa memlekettik tilde etıketka bekitý talaby ýaqytsha alynyp tastalady
2022 jylǵy 21 naýryz 13:48

Import taýarlarǵa memlekettik tilde etıketka bekitý talaby ýaqytsha alynyp tastalady

NUR-SULTAN. QazAqparat - Búgin Nur-Sultanda Qazaqstan Premer-Mınıstri Álıhan Smaıylovtyń tóraǵalyǵymen daǵdarysqa qarsy sharalar jónindegi jedel shtabtyń kezekti otyrysy ótti, dep habarlaıdy QazAqparat.

Úkimettiń baspasóz qyzmeti taratqan málimetke sensek, keńeske qatysýshylar saýda salasyndaǵy tehnıkalyq retteý sharalaryn talqylaǵan.

Atap aıtqanda, bıznes-qaýymdastyq ókilderi ımporttalatyn taýarlarǵa qatysty memlekettik tildegi etıketkalar men qosymshalardy bekitý jónindegi zańnama talaptaryn ýaqytsha alyp tastaýdy usyndy.

Otyrysqa qatysýshylardyń aıtýynsha, mundaı sheshimdi qabyldaý etıketkalardy ázirleýge, olardy kóbeıtýge jáne bekitýge qatysty bıznes shyǵyndaryn aıtarlyqtaı azaıtýǵa múmkindik beredi.

Oǵan balama retinde sórelerde taýarlar týraly barlyq qajetti aqparatty qamtıtyn taýarlyq QR-kodtardy ýaqytsha paıdalaný usynyldy.

Óz usynysynda bıznes-qaýymdastyq ókilderi Memleket basshysyna daǵdarystyq jaǵdaılar kezeńinde, onyń ishinde memlekettik baqylaý, halyqaralyq mindettemelerdi saqtaý sheńberinde jáne t. b. retteýdiń ózge de tártibin belgileıtin tapsyrmalar júkteýge nemese aktiler qabyldaýǵa múmkindik beretin Prezıdenttiń 2020 jylǵy 20 naýryzdaǵy №286 Jarlyǵynyń erejelerin basshylyqqa aldy.

Premer-Mınıstr otandyq bıznes ókilderiniń bastamasyn qoldap, Qazaqstan Respýblıkasy Prezıdentiniń tıisti Jarlyǵynyń jobasyn daıyndaýdy, sondaı-aq ony osy aptanyń sońyna deıin Memleket basshysynyń qaraýyna engizýdi tapsyrdy.

Jedel shtabtyń kelesi otyrysy 24 naýryzda ótedi.



Uqsas jańalyqtar
Seriktester jańalyqtary

Jańalyqtar

Úrdis

MURAǴAT