ІІ dúnıejúzilik soǵysta qaza tapqan jaýyngerlerdiń súıekteri elge jetkizildi
2022 jylǵy 25 maýsym 17:04

ІІ dúnıejúzilik soǵysta qaza tapqan jaýyngerlerdiń súıekteri elge jetkizildi

NUR-SULTAN. QazAqparat – Qazaqstan Qarýly kúshteriniń áskerı borty soǵys jyldarynda qaza tapqan jaýyngerler – Nıkolaı Gýrov, Tólegen Úrkerbaev jáne Petr Fomenkonyń súıekterin Máskeýden Nur-Sultanǵa jetkizdi, dep habarlaıdy QazAqparat Qorǵanys mınıstrligine silteme jasap.

«Surapyl soǵystan oralmaı, habar-osharsyz ketken sarbazdar men ofıtserlerdiń urpaqtary áli kúnge deıin babalary jaıly habar kútedi. Soǵysta qaza tapqan sońǵy sarbaz jerlengenge deıin izdeý jalǵasa bermek. Biz birlesip atqaryp jatqan jumys jastarǵa áskerı-patrıottyq tárbıe berýge, qazaqstandyq jaýyngerlerdiń janqııarlyǵy men batyldyǵy týraly tarıhty jadymyzda saqtaýǵa barynsha yqpal eterine senimdimin», - dedi rásim barysynda Qorǵanys mınıstri, general-polkovnık Rýslan Jaqsylyqov.

Mınıstr qazaqstandyq jaýyngerlerdiń súıekterin izdestirýge belsene qatysqandardyń bárine alǵys bildirdi.

Tólegen Úrkerbaev – Almaty oblysynyń Uzynaǵash kentinen, Petr Abramovıch Fomenko – Qostanaı oblysy Altynsarın aýdanynyń erbakovka aýylynan, Nıkolaı Matveevıch Gýrov – Almaty qalasynan ekeni naqtylanǵan.

Atalǵan óńirlerde jaýyngerlerdiń súıekterin qarsy alý, týystaryna berý jáne áskerı qurmet kórsetilip, qaıta jerleý rásimderi ótedi.

Aıta keteıik, shara uıymdastyrýshysy - «Atamnyn Amanaty» qoǵamdyq birlestigi. Ol Qazaqstannan ІІ dúnıejúzilik soǵysqa attanyp, qaza tapqan jáne habarsyz ketken sarbazdardyń jerlengen jerin anyqtaý boıynsha muraǵattyq-izdestirý jumystarymen aınalysady.

«Surapyl soǵystyń bastalǵanyna seksen jyldan astam ýaqyt ótti. Bizdiń uıym bul rette muraǵat derekterin jınaýda tynymsyz jumys istep keledi. Jeńis jolynda bizdiń jarqyn bolashaǵymyz úshin qaza tapqandardyń esimderi anyqtalyp, olar izdeýshilermen únemi baılanysta bolady», - dedi «Atamnyn Amanaty» QB basqarma tóraǵasy Murat Moldaǵalıev.



Jańalyqtar

Úrdis

MURAǴAT