Hokkeıden álem chempıonaty: Qazaqstannyń jasóspirim qyzdary óz tobynda birinshi oryn aldy
ASTANA. QazAqparat - Shaıbaly hokkeıden 18 jasqa deıingi sportshylar arasyndaǵy álem chempıonatynda qazaqstandyq jasóspirim qyzdar besinshi márte jeńiske jetti, dep habarlaıdy QazAqparat tilshisi.
Aıta ketsek, el quramasy ekinshi dıvızıonynda V tobynda synǵa tústi. Qarsylastary - Bolgarııa, Jańa Zelandııa, Belgııa, Estonııa, Islandııa.
Buǵan deıin QR hokkeıshileri Bolgarııany - 8:1, Jańa Zelandııany - 7:1, Belgııany 5:3, Estonııany 8:0 esebimen jeńgen edi.
Qazaqstandyq hokkeıshiler besinshi kezdesýinde Islandııa quramasymen kezdesti. Eki quramanyń da óz tobynda birinshi oryn alýyna múmkindigi boldy. Islandııalyq hokkeıshiler jeńiske jetken jaǵdaıda týrnır kestesinde kósh basyna shyǵatyn edi.
Birinshi kezeńde el quramasynan Sofııa Zýbkova 15, 18-mınýtynda mergendik tanytty. Ol buǵan deıingi tórt kezdesýde on gol soǵyp úlgerdi.
Ekinshi kezeńde qazaqstandyq Madıanna Núsipova 21, Anastasııa Fılımonova 28, Sofııa Rakovskaıa 33-mınýtta gol soqsa, Sofııa Zýbkova 36-mınýtta het-trıktiń avtory atandy.
Al 36-mınýtta Sofııa Rakovskaıa taǵy bir shaıbany soqty.
Osylaısha qazaqstandyq hokkeıshiler qarsylasynan 7:0 esebimen basym tústi.
Qorytyndy oıyn kestesinde qazaqstandyq hokkeıshiler 15 upaımen birinshi oryn aldy. Odan keıingi oryndardaǵy Belgııanyń 11, Islandııanyń 9, Jańa Zelandııanyń 6, Bolgarııanyń 4, Estonııanyń 0 upaıy bar.
Osylaısha qazaqstandyq hokkeıshiler endi ekinshi dıvızıonnyń A tobynda synǵa túsýge múmkindik aldy.
