Halyqaralyq sındıkat Qazaqstan arqyly Nıderlandqa esirtki jetkizip otyrǵan
2022 jylǵy 7 shilde 12:38

Halyqaralyq sındıkat Qazaqstan arqyly Nıderlandqa esirtki jetkizip otyrǵan

NUR-SULTAN. QazAqparat - Ulttyq qaýipsizdik komıteti iri halyqaralyq esirtki sındıkatynyń zańsyz áreketiniń jolyn kesýge baǵyttalǵan kópsatyly halyqaralyq operatsııany iske asyrdy, dep habarlaıdy QazAqparat.

Bul qylmystyq top Taıaý Shyǵys pen Azııa azamattarynan quralǵan.

Esirtki kontrabandasy arnasynyń marshrýty Aýǵanstannan bastaý alyp, odan ári Qazaqstan aýmaǵy arqyly júrgen, aqyrǵy baratyn jeri Nıderland bolǵan.

Osy top áreketiniń aýqymdy geografııasyn eskere otyryp, UQK Nıderland Koroldiginiń quqyq qorǵaý organdarymen birge ózara is-qımyl uıymdastyrdy.

Operatsııanyń tabysty iske asyrylýyna Ortalyq Azııa óńirlik esirtkige qarsy kúres jónindegi aqparattyq úılestirý ortalyǵy men Qazaqstan Respýblıkasy Bas prokýratýrasynyń qarqyndy túrde járdem kórsetýi yqpal etti.

Birlesken jedel is-sharalar nátıjesinde halyqaralyq esirtki sındıkatynyń basty qatysýshylary anyqtaldy.

Nıderland aýmaǵynda esirtki jetkizý barysynda kýrer ustalyp, odan Aýǵanstanda óndirilgen 30 kılogramm geroın tárkilendi.

Budan ári, Amsterdam qalasy quqyq qorǵaý organdary tintý barysynda iri esirtki plantatsııasyn tapty.

Sarapshylardyń dereginshe, jetkiziletin elde alynǵan esirtki quraldarynyń quny - 2 mln AQSh dollary.

Anyqtalǵan faktiler boıynsha Nıderland quqyq qorǵaý organdary sotqa deıingi tergeý júrgizip jatyr.


Foto: cdn.iz.ru
Uqsas jańalyqtar

Jańalyqtar

Úrdis

MURAǴAT