Jańalyqtar  >
Halyqaralyq Kaspıı kúni: teńiz ıtbalyǵynyń joıylý qaýpi bar
2022 jylǵy 12 tamyz 22:43

Halyqaralyq Kaspıı kúni: teńiz ıtbalyǵynyń joıylý qaýpi bar

NUR-SULTAN. QazAqparat – Búgin Kaspıı jaǵalaýyndaǵy elder qoǵamnyń nazaryn teńizdiń qorshaǵan ortasyn qorǵaý qajettiligine aýdarýǵa baǵyttalǵan halyqaralyq Kaspıı kúnin atap ótti, dep habarlaıdy QazAqparat Azamattyq bastamalardy qoldaý ortalyǵynyń baspasóz qyzmetine silteme jasap.

Aqtaýda Mańǵystaý oblysynyń ákimi Nurlan Noǵaevtyń qatysýymen «Mańǵystaý oblysynyń ekologııalyq máseleleri: tájirıbe, problemalar jáne damý perspektıvalary» atty dóńgelek ústel ótti. Shara ǵalymdardyń, memlekettik organdardyń, úkimettik emes qoǵamdyq uıymdardyń, munaı-gaz kompanııalary ókilderiniń basyn qosty.

«Kóteriletin máselelerdiń biri – Kaspıı ıtbalyǵynyń joıylyp ketý qaýpi. Sońǵy kezde osy túrge tıesili janýarlardyń sany sońǵy ýaqytta azaıyp keledi. Kaspıı ıtbalyǵy – Kaspıı teńiziniń endemıgi. Memlekettik organdar men iri korporatsııalardan bastap Kaspıı mańy aımaǵynyń turǵyndaryna deıingi barlyq múddeli taraptardyń qoldaýyna senemin. Bul kúrdeli máseleni biz tek kúshimizdi biriktirý arqyly ǵana sheshe alamyz», - deıdi «Kaspıı ıtbalyǵyn zertteý jáne ońaltý ortalyǵynyń» basshysy Adylhan Tovasarov.

Іs-sharany uıymdastyrýshylardyń aıtýynsha, óńirdiń ekologııalyq problemalary Kaspııdiń bıologııalyq resýrstarynyń sarqylýymen, munaıdyń saldarynan lastaný táýekelderimen baılanysty.

«EcoBatys» bastamasy aıasynda Mańǵystaý oblysynyń qoǵamdyq birlestikteri «Shell Qazaqstan» kompanııasynyń jáne Azamattyq bastamalardy qoldaý ortalyǵynyń qoldaýymen halyqtyń ekologııalyq saýattylyǵyn arttyrýǵa, eko-mádenıetin qalyptastyrýǵa, Kaspıı ıtbalyǵyn saqtaýǵa baǵyttalǵan 6 jobany júzege asyrady. Mundaı áleýmettik jobalar ÚEU-ǵa qoldaý kórsetip qana qoımaı, óńirdegi ekologııalyq problemalardy sheshýge eleýli úles qosady», - deıdi Azamattyq bastamalardy qoldaý ortalyǵynyń basqarma tóraǵasy Ǵalym Qurman.

Qoǵam belsendileriniń pikirinshe, óńirdegi ekologııalyq problemalardy memlekettik organdardyń, ÚEU-nyń, ǵalymdardyń, eriktilerdiń birlesken kúshimen ǵana sheshýge bolady.


Foto: www.wallpapermaiden.com


Uqsas jańalyqtar
Seriktester jańalyqtary

Jańalyqtar

Úrdis

MURAǴAT