Ǵylym jáne joǵary bilim mınıstrligi janynan Qoǵamdyq keńes quryldy

2022 jylǵy 28 qarasha, 14:06
Ǵylym jáne joǵary bilim mınıstrligi janynan Qoǵamdyq keńes quryldy

ASTANA. QazAqparat - Ǵylym jáne joǵary bilim mınıstrligi janynan Qoǵamdyq keńes quryldy. Onyń quramyna Parlament depýtattary, memleket jáne qoǵam qaıratkerleri, ǵalymdar, oqytýshylar, azamattyq qoǵam jáne BAQ ókilderi kirdi, dep habarlaıdy QazAqparat.

Ǵylym, joǵary bilim jáne til saıasaty máseleleri jónindegi qoǵamdyq keńestiń alǵashqy otyrysyna mınıstr Saıasat Nurbek qatysyp, vedomstvonyń aldaǵy josparlaryna toqtaldy.

«Jańadan qurylǵan mınıstrliktiń aldyna Memleket basshysy úlken mindetter qoıyp otyr. Ǵylym men joǵary bilim salasyna qatysty barlyq sheshimderdi ózderińizdiń talqylaýlaryńyzǵa usynamyz. Sebebi Qoǵamdyq keńestiń jumysy arnaıy zańmen aıqyndalǵan. Quzyreti de joǵary. Jurtshylyqtyń, azamattyq qoǵamnyń pikirin eskerip, bizge qoldaý kórsetedi dep senemiz», – dedi mınıstr.

Otyrysqa Qoǵamdyq keńestiń 17 múshesiniń 11-i oflaın, 6-ýy onlaın qatysty. Daýys berý arqyly ǵylym jáne joǵary bilim salasynda, sondaı-aq qoǵamdyq keńes jumysyn júrgizýde tájirbıesi mol qoǵam qaıratkeri Serik Yrsalıev Qoǵamdyq keńes tóraǵasy bolyp saılandy.

Mınıstrliktiń salalyq baǵyty eskerilip, 5 komıssııa quryldy. Olardyń tóraǵalary saılandy.

1. Normatıvtik-quqyqtyq aktilerdiń jobalaryn qaraý jáne sybaılas jemqorlyqqa qarsy is-qımyl máseleleri boıynsha komıssııa tóraǵasy bolyp «D. Serikbaev atyndaǵy Shyǵys Qazaqstan tehnıkalyq ýnıversıteti» kommertsııalyq emes aktsıonerlik qoǵamynyń ǵylymı keńesshisi Jasulan Shaımardanov;

2. Bıýdjet máseleleri boıynsha komıssııa tóraǵasy bolyp QR Parlamenti Májilisiniń depýtaty Irına Smırnova;

3. Ǵylym máseleleri boıynsha komıssııa tóraǵasy bolyp «QazBioPharm» Ulttyq holdıngi» aktsıonerlik qoǵamynyń basqarma tóraǵasy Kúnsulý Zakarııa;

4. Joǵary bilim máseleleri boıynsha komıssııa tóraǵasy bolyp azamattyq qoǵam ókili Amantaı Nurmaǵambetov;

5. Til saıasaty máseleleri boıynsha komıssııa tóraǵasy bolyp QR Parlamenti Májilisiniń depýtaty Maqpal Tájmaǵambetova saılandy.

Jıyn sońynda 3 jylǵa saılanǵan Qoǵamdyq keńestiń tóralqasy bekitildi.


Uqsas jańalyqtar
Seriktester jańalyqtary

Jańalyqtar