Golovkın-Sheremeta keshinde taǵy bir qazaqstandyq jekpe-jek ótkizedi

NUR-SULTAN. QazAqparat – 18 jeltoqsanda Gollıvýdtyń (Florıda, AQSh) «Seminole Hard Rock Hotel & Casino» arenasynda qazaqstandyq kásipqoı boksshy, orta salmaqtaǵy IBF/IBO álem chempıony Gennadıı Golovkınniń (40-1-1, 35 KO) qatysýymen kásipqoı boks keshi ótedi. Jerlesimiz bul kúni óziniń mindetti qarsylasy Kamıl Sheremetamen (21-0, 5 KO) kezdesedi, dep habarlaıdy QazAqparat Sports.kz portalyna silteme jasap.

Basty jekpe-jekterdiń birinde taǵy bir qazaqstandyq – ekinshi orta salmaqtaǵy boksshy Álı Ahmedov (16-0, 12 KO) Ekvador ókili Karlos Gongoramen (18-0, 13 KO) kezdesedi. Bul jekpe-jektiń jeńimpazy ekinshi orta sanattaǵy IBO álem chempıony atanady. Aıta keteıik, qazirgi ýaqytta Álı ekinshi orta salmaqta WBC International Silver chempıony ataǵyna ıe.