Germanııa bıligi elde tóńkeris jasamaq bolǵandar sanynyń ósýi múmkin ekenin aıtty

2022 jylǵy 9 jeltoqsan, 10:42
Germanııa bıligi elde tóńkeris jasamaq bolǵandar sanynyń ósýi múmkin ekenin aıtty

ASTANA. QazAqparat – Germanııada qaýipsizdik organdary oń ekstremısterdiń isi boıynsha taǵy tintý júrgizilip, osy iske qatysy bar adamdardyń tutqyndalatynyn joqqa shyǵarmaıdy. «Reıhsbıýrgerler» memlekettik bılikti kúshpen basyp almaq bolǵan, dep habarlaıdy QazAqparat Euronews-ke silteme jasap.

Terrorıstik top qatysýshylary arasynda áskerıler, tártip saqshylary men býndestagtyń eks-depýtaty bolǵan. Aýqymdy polıtsııa operatsııasy Germanııa, Aýstrııa jáne Italııada ótti.

«Aıyptylar tizimindegi adamdar sany qazirgi tańda 54 adamdy quraıdy. Keshe taǵy ekeýi ustaldy. Osy iske qatysy bolýy múmkin taǵy basqa da adamdardy anyqtadyq. Ustalýshylar sany taǵy da ósýi múmkin», - dedi Qylmystyq ister jónindegi federaldyq vedomstvo basshysy Holger Mıýnh.

Bıliktiń málimetinshe, operatsııaǵa quqyq qorǵaý organdarynyń 11 federaldyq jerindegi 3000 astam qyzmetkeri tartyldy. Ustalýshylar arasynda Reseı azamatshasy da bar. Eske salaıyq, buǵan deıin Germanııa polıtsııasy bılikti kúshpen qulatýǵa daıyndyq júrgizgen «ishki terrorıstik uıymnyń» 25 kúdikti múshesi men jaqtastaryn tutqyndaǵan bolatyn.

Quqyq qorǵaý organdarynyń málimetinshe, olar bul tóńkeristi biraz ýaqyttan beri josparlaǵan, tek ońtaıly sátti kútip otyrǵan eken.

Foto: Paul Zinken/dpa


Tegı:
Eýropa   Álem  
Seriktester jańalyqtary

Jańalyqtar