Fýtzaldan Eýropa chempıonaty: Qazaqstan men Slovenııa teń oınady

NUR-SULTAN. QazAqparat - Búgin fýtzaldan 2022 jylǵy Eýropa chempıonatynda Qazaqstan quramasy toptyq kezeńdegi alǵashqy oıynyn Slovenııaǵa qarsy ótkizdi, dep habarlaıdy QazAqparat tilshisi.

Eske salsaq, qazaqstandyq qurama V tobynda synǵa túsedi. Qarsylastary - Italııa, Slovenııa jáne Fınlıandııa.

Búgingi kezdesýdi qazaqstandyq fýtzalshylar sátsiz bastady. Birinshi kezeńde qaqpashy Igıta óreskel qatelik jiberip aldy. Nátıjesinde slovenııalyq Denıs Totoshkovıch 10-mınýtta ashyq qaqpany dál kózdedi. Al 11-mınýtta qazaqstandyq Albert Aqbalyqov qarsylas qurama qaqpashysyna dóreki qımyl kórsetip, «qyzyl» qaǵazben alańnan qýyldy.

Budan keıin qazaqstandyq fýtzalshylar tarazy basyn teńestirýge umtyldy. Oıynnyń 15-mınýtynda Dýglas Jýnıor buryshtamadan áýelete berilgen dopty qaqpa torynda týlatty.

Ekinshi kezeńniń 22-mınýtynda Mateı Fıdershek qaıtadan Slovenııa quramasyn alǵa shyǵardy. Al 24-mınýtta Birjan Orazov taǵy tarazy basyn teńestirdi. Budan keıin Jıga Cheh 30, Teo Týrk 32-mınýtta Slovenııanyń basymdyǵyn arttyrdy. Oıynnyń 35-mınýtta Jomart Toqaev esep aıyrmasyn qysqartsa, Dýglas Jýnıor 38-mınýtta kózdegen nysanadan múlt ketken joq.

Osylaısha Qazaqstan alǵashqy kezdesýinde qarsylasymen 4:4 esebine qanaǵat bildirdi.

Aıta ketsek, quramanyń bas bapkeri Rıkardo Kaka koronavırýs juqtyryp, búgingi kezdesýge qatysa almady. Onyń mindetin kómekshisi Sergeı Korıdze atqardy.

Endi ulttyq qurama 24 qańtarda Fınlıandııamen, 28 qańtarda Italııamen sheberlik baıqasady.

Eske salsaq, Qazaqstan quramasy buǵan deıin Eýropa chempıonaty fınaldyq satysynda eki márte synǵa tústi. 2016 jyly - 3, 2018 jyly 4-oryn aldy.