FÝTBOLDAN ÁLEM ChEMPIONATY-2022
  Jańalyqtar  >
  Sport

Fýtboldan Qazaqstan chempıonatynda «Aqjaıyq» pen «Turan» teń oınady

2022 jylǵy 5 qazan, 18:01
Fýtboldan Qazaqstan chempıonatynda «Aqjaıyq» pen «Turan» teń oınady

ORAL. QazAqparat – Fýtboldan Qazaqstan chempıonatynda Oraldyń «Aqjaıyǵy» óz alańynda Túrkistannyń «Turan» komandasyn qabyldady, dep habarlaıdy QazAqparat tilshisi.

Bul birinshi aınalymda aýa raıyna baılanysty ótpeı qalǵan 2-týrdyń oıyny bolatyn.

Qarsylastar osyǵan deıin ózara úsh ret kezdesip, bireýinde oraldyqtar jeńiske jetip, ekeýi teń aıaqtalǵan edi.

Týrnır kestesinde «Aqjaıyq» 21 upaımen 13-orynda tursa, odan eki upaıy artyq «Turan» 11-satyda keledi. Sondyqtan match qos komanda úshin de asa mańyzdy edi.

Birinshi taımda oń qanattan órbigen shabýyldan keıin 21-mınýtta «Turannyń» qorǵaýshysy, Belarýs legıoneri Andreı Zaleskıı óz qaqpasyna gol soǵyp aldy. 29-mınýtta túrkistandyq Samır Fazlı aıyp dobyn oryndaǵannan keıin tarazy basy teńesti – 1:1.

Ekinshi taımda qonaqtar sapynda dóreki oınaǵan Mıhaıl Bashılov 68-mınýtta alańnan qýyldy. Budan keıin alań ıeleri qansha tyrysqanymen, eshteńe shyǵara almady. Qorytyndy esep – 1:1.

Kelesi týrda «Aqjaıyq» 9 qazanda syrt alańda «Maqtaaralmen», «Turan» «Shahtermen» oınaıdy.

Eske sala keteıik, budan buryn fýtboldan Qazaqstan chempıonatynda «Aqjaıyqtyń» kósh basyndaǵy «Aqtóbeni» utqanyn jazǵan bolatynbyz.

Sýretterdi túsirgen Aıbatyr NURASh


Tegı:
Sport   Fýtbol  
Uqsas jańalyqtar
Seriktester jańalyqtary

Jańalyqtar